Օհանավանում թուրքերը հողակտորնե՞ր են գնել. պարզաբանում է գյուղապետը

Օրերս լրատվականները լուրեր տարածեցին, որ Արագածոտնի մարզի մի քանի գյուղերում օտարերկրացիները հողակտորներ են ձեռք բերում և տներ կառուցում: hayeli.am-ը փորձեց կապ հաստատել մի քանի համայնքապետերի հետ՝ պարզելու, արդյոք օտարերկրացիները կապիտալներ են ձեռք բերում ՀՀ գյուղերում:
 Արագածոտնի մարզի Օհանավան համայնքի ղեկավար Էդգար Հայրապետյանը մեր հարցին՝ արդյոք Օհանավան համայնքում ապրում են օտարերկրացիներ, պատասխանեց. 
«Գյուղում բնակվող օտարերկրացիներ չունենք, 2 տուն ունենք գնված արաբների կողմից, բայց հիմնական բնակվողներ չունենք: Գնել են նաև փոքր հողակտորներ: Կիսակառույց տներ են,ասում էին՝ արաբների է պատկանում, ամռանն էլ ինչ-որ ժամանակահատված գալիս-գնում են: Մի քանի հողակտորներ այգիների են վերածվում, գյուղացիներն են աշխատում»: 

Շարունակելով խոսքը՝ գյուղապետն ասաց. «Այդ հողակտորները նոր չեն գնել՝3-4 տարի առաջ մոտավոր: Մենք չգիտենք՝ ովքեր են սեփականատերերը՝ արաբնե՞ր, թե՞ թուրքեր: Խոսակցություններ են պտտվում,որ արաբներ են, հինգ անուն ունենք մեր բազայում, հավանաբար արաբներ են»,- եզրափակեց խոսքը Էդգար Հայրապետյանը: 

Մենք փորձեցինք զրուցել նաև Կարբիի գյուղապետի հետ, վերջինս մեր զանգերին այդպես էլ չպատասխանեց:

Մանե Ամիրխանյան