Առուշին չե՛ք կոտրելու․գնացեք, հարցրեք՝ ո՞վ էր ապահովում Ստեփանակերտի հացը (video)

Այսօր Վերաքննիչ քրեական դատարանը՝ նախագահությամբ դատավոր Ռուբիկ Մխիթարյանի, Գորիսի համայնքապետ Առուշ Առուշանյանի նկատմամբ ընտրված խափանման միջոց կալանքը գրավով փոխարինելու մասին պաշտպանների միջնորդությունը մերժեց։

Առուշանյանի նկատմամբ ընտրված խափանման միջոց կալանքը գրավով փոխարինելու համար գրավի չափը պաշտպանները սահմանել են 80 միլիոն ՀՀ դրամից ավելի։

Մելքոնյանը նշեց, որ Առուշանյանի նկատմամբ իրականցվում է քաղաքական հետապնդում.

«Ես կարծում եմ՝ դատարանը որեւէ հիմք չուներ, որպեսզի մեր միջնորդությունը մերժեր։ Եթե գրավը չի կիրառվում Առուշանյանի նկատմամբ, ապա ո՞ւմ նկատմամբ է կիրառվում։ 25 տարեկանից համայնք է ղեկավարել, ճանաչվել է Հայաստանի լավագույն համայնքապետ, երբ հայրենիքը խնդիր է ունեցել, եկել ու սատար է կանգնել։ Առուշանյանը պատերազմի ժամանակ կազմակերպել է 13 հազար արցախցիները գոյությունը Գորիսում։ Գնացեք, հարցրեք՝ ո՞վ էր ապահովում Ստեփանակերտի հացը, ի՞նչ միջոցներով, կա՞ պետական աջակցություն, բացի Առուշանյանից։ Իրենք վախենում են Առուշանյանի տեսակից։ Եթե մտածում են՝ Առուշանյանին այս ճանապարհով կարող են կոտրել, պարապ գործով են զբաղված։ Առուշ Առուշանյանը չկոտրվող տեսակ է»։

Հիշեցնենք, որ Գորիսի համայնքապետ Առուշ Առուշանյանը մեղադրվում է համայնքի ընտրողներից առավելագույն քվեներ ապահովելու եւ ընտրություններում ցանկալի արդյունք արձանագրելու անձնական եւ խմբային շահերից ելնելով, ԱԺ արտահերթ ընտրությունների (որին ինքը մասնակցում էր «Հայաստան» դաշինքի ընտրական ցուցակով) նախընտրական քարոզարշավի ընթացքում ուղղակի դիտավորությամբ ծանր հանցագործություն նախապատրաստելու, այն է` ընտրություններին մասնակցելու եւ «Հայաստան» դաշինքի օգտին կողմ քվեարկելու համար երկու կամ ավելի ընտրողի կաշառք տալու մեջ՝ ՀՀ ՔՕ 35-154.2-րդ հոդվածի 4-րդ մասի 2-րդ կետով, 38-149-րդ հոդվածի 2-րդ մասի 4-րդ կետով եւ 38-154.2-րդ հոդվածի 3-րդ մասով:

Բացի այդ, ըստ մեղադրանքի, Առուշ Առուշանյանը Գորիս համայնքի Քարահունջ բնակավայրի վարչական ղեկավար Լուսինե Ավետյանի միջոցով կազմակերպել է նույն բնակավայրի ընտրողներին 2021 թվականի հունիսի 20-ին նշանակված ԱԺ արտահերթ ընտրություններին մասնակցելուն եւ «Հայաստան» դաշինքի օգտին կողմ քվեարկելուն հարկադրելը:

Առուշանյանն իրեն առաջադրված մեղադրանքը չի ընդունում։ Նրա պաշտպաններն էլ այդ քրեական գործերը որակում են որպես քաղաքական հետապնդում Առուշանյանի նկատմամբ։