ԲԴԽ դատավոր անդամները պետք է հրաժարական տան. Բորիս Բախշիյանի փաստաբան (video)

Դատավոր Բորիս Բախշիյանի փաստաբան Արսեն Սարդարյանը հավատում է, որ Հայաստանում դեռ մահացած չէ արդարությունն ու շուտով դատավորի նկատմամբ քրեական գործն ավարտվելու է:

«Բորիս Բախշիյանից ներողություն են խնդրելու իրավապահ մարմինների մի շարք ներկայացուցիչներ, բայց Բարձրագույն դատական խորհրդի անդամները, մասնավորապես, դատավոր անդամները ներողությունով չպետք է պրծնեն. նրանք պետք է հրաժարական տան ու դուրս գան»,-լրագրողների հետ զրույցում ասաց Սարդարյանը:

Նա Դատավորների ընդհանուր ժողովին կոչ արեց այս հարցը բարձրացնել ու հրապարակայնորեն անվստահություն հայտնել ԲԴԽ-ի դատավոր ներկայացուցիչներին. նրանց վարքագիծն անթույլատրելի է:

Այսօր դատավոր Բախշիյանը հայտարարել էր, որ իր ամբողջ աշխատանքային գործունեության ընթացքում մշտապես առաջնորդվել է իր սեփական սկզբունքներով: Նա նշել էր, թե իր նկատմամբ իրականացվող ողջ գործընթացը բացառապես միջամտություն է իր՝ որպես դատավորի լիազորությունների իրականացմանը:

Հիշեցնենք` հունվարի 31-ին Բարձրագույն դատական խորհրդին ՀՀ գլխավոր դատախազի կողմից ներկայացվել էր երկու միջնորդություն՝ Սյունիքի մարզի ընդհանուր իրավասության դատարանի դատավոր Բորիս Բախշիյանի նկատմամբ քրեական հետապնդում հարուցելու վերաբերյալ համաձայնություն տալու մասին և դատավորին ազատությունից զրկելու վերաբերյալ համաձայնություն տալու մասին։

Խորհուրդը միաձայն որոշել է ներկայացված երկու միջնորդությունը բավարարել:

Դատավորների միությունը հայտարարությամբ էր հանդես եկել՝ մտահոգություն հայտնելով Սյունիքի մարզի առաջին ատյանի ընդհանուր իրավասության դատարանի դատավոր Բորիս Բախշիյանի նկատմամբ դատախազության և ԱԱԾ քննչական դեպարտամենտի կողմից քրեական հետապնդում իրականացնելու և անձեռնմխելիությունից (այդ թվում անձնական ազատությունից) զրկելով զուգորդված քրեական հետապնդում իրականացնելու գործընթացի հետ կապված, որը պայմանավորված է դատավորի գործունեության հետ։

Հունվարի 26-ին Բորիս Բախշիյանի որոշմամբ «Սիսական» ջոկատի հրամանատար Աշոտ Մինասյանն ազատ էր արձակվել

Բորիս Բախշիյանը քննում է նաև Քաջարանի քաղաքապետ Մանվել Փարամազյանի, Գորիսի փոխքաղաքապետեր Մենուա Հովսեփյանի և Իրինա Յոլյանի քրեական գործերը:

Բորիս Բախշիյանի լիազորությունները կասեցվել են. նման որոշում է կայացրել ԲԴԽ-ն։