Բերդ քաղաքում 33-ամյա տղամարդու սպանելու կասկածանքով հետախուզում է հայտարարվել ավազակային հարձակման համար նախկինում դատվածի նկատմամբ

Հուլիսի 11-ին Հայաստանի քննչական կոմիտեի Տավուշի մարզային քննչական վարչության քննիչը միջնորդություն է ներկայացրել Տավուշի մարզի ընդհանուր իրավասության դատարան, որպեսզի դատարանը սպանություն կատարելու կասկածանքով երկամսյա կալանքի որոշում կայացնի Բերդ քաղաքի բնակիչ 29-ամյա Հրանտ Անանյանի նկատմամբ: Ինչպես հայտնում է ֆոտոլրագրող Գագիկ Շամշյանը, դատարանը բավարարել է քննչական մարմնի միջնորդությունը և Հ. Անանյանի նկատմամբ խափանման միջոց է ընտրել երկամսյա կալանքը: Եթե Հ. Անանյանը հայտնաբերվի կամ մեղայականով ներկայանա իրավապահներին, ապա նա տեղափոխվելու է Վանաձոր քրեակատարողական հիմնարկ: Գ. Շամշյանի տեղեկություններով՝ Հ. Անանյանը նախկինում ավազակային հարձակում կատարելու համար դատապարտված է եղել: Իսկ այս անգամ նա կասկածվում է հուլիսի 5-ին Բերդ քաղաքում 33-ամյա Դավիթ Բադալյանին սպանելու մեջ՝ իրար միջև եղած պարտք ու պահանջի պատճառով: Ինչպես ավելի վաղ հայտնել էր SHAMSHYAN.COM-ը, հուլիսի 5-ին ժամը 22:30-ի սահմաններում Բերդի բժշկական կենտրոնից ոստիկանության Տավուշի բաժին հայտնել են, որ շտապօգնության հերթապահ խումբը կանչով մեկնել է քաղաքի ավտոկայան, որտեղ հայտնաբերել են երիտասարդ տղայի դի: Դատաբժշկի նախնական եզրակացության համաձայն՝ երիտասարդը մահացել է սուր ծակող-կտրող գործիքից՝ որովայնի շրջանում ստացած վնասվածքից, իսկ բժիշկներն էլ արձանագրել են «աորտալ արյունահոսություն հարցականով, մահ տեղում» ախտորոշում: Գ Շամշյանի տեղեկություններով՝ սպանվածը Բերդ քաղաքի Թումանյան փողոցի 19 տան բնակիչ, 33-ամյա Դավիթ Բադալյանն էր: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: