«Ի՞նչ կանեիք, եթե ժամանակը հետ տայինք», «նույնը կանեի». Շուշանիկ Բախշյանը ՝Մերի Մարգարյանի ամուսնուն

Շենգավիթ վարչական շրջանի ընդհանուր իրավասության առաջին ատյանի դատարանում շարունակվում է ծննդկան Մերի Մարգարյանի և նրա նորածնի մահվան գործով դատավարությունը` դատավոր Դավիթ Բալայանի նախագահությամբ։ Դատական նիստին ամբաստանյալ Շուշանիկ Բախշյանը պատասխանեց դատավարության կողմերի հարցերին: Մերի Մարգարյանի հայրը՝ Վաղինակ Մարգարյանը, այսօր՝ հուլիսի 11-ին, գործով ամբաստանյալ Շուշանիկ Բախշյանից հետաքրքրվեց՝ ինչու մահացան իր դուստրն ու թոռնիկը: «Դուք ասում եք, որ մտերիմ հարաբերության մեջ եք եղել, արել եք ամեն ինչ, ինչո՞ւ մահացավ Մերի Մարգարյանն ու իմ թոռնիկը, պատասխանեք, խնդրում եմ, կապ չունի, որ չեք ընդունում ձեր մեղավորությունը»,- Շենգավիթ վարչական շրջանի ընդհանուր իրավասության դատարանում Շուշանիկ Բախշյանին դիմեց տուժողի իրավահաջորդ Վաղինակ Մարգարյանը: Ամբաստանյալը նշեց, որ կան հիվանդություններ, որոնք նման տխուր ավարտ են ունենում: Միեւնույն ժամանակ, Շուշանիկ Բախշյանն ընդգծեց, որ երկու տարի է՝ ինքն իրեն հարց է տալիս եւ փորձում վերլուծել, թե ինչ կարող էին անել, որը չեն արել: Վաղինակ Մարգարյանը հետաքրքրվեց՝ ինչու կեսարյան հատում չարեց եւ չփրկեց իր դստերն ու թոռնիկին: Շուշանիկ Բախշյանը պատասխանեց, որ ինքը հիվանդանոց է եկել հուլիսի 27-ին առավոտյան եւ անհրաժեշտ էին համապատասխան հետազոտություններ վիճակը գնահատելու եւ ճիշտ որոշում կայացնելու: Մերի Մարգարյանի հոր հարցին, թե ինչու չեք ընդունում, որ չեք հասկացել, թե ինչ հիվանդություն է ունեցել Մերին, Շուշանիկ Բախշյանը պատասխանեց, թե ինքն ընտանիքի հետ հավասար ցավում է կատարվածի համար:Մերի Մարգարյանի ամուսինը՝ Արթուր Հարությունյանը հարցրեց, թե քանի անգամ է ինքը հիվանդասենյակ կանչել Շուշանիկ Բախշյանին։ Վերջինս պատասխանեց, որ ընդամենը մեկ անգամ, որից 10-12 րոպե անց ինքը մոտեցել է հիվանդին: «40 րոպե անց չեք եկե՞լ»,- հարցրեց տուժողի իրավահաջորդ  ճանաչված Արթուր Հարությունյանը: Ամբաստանյալը բացասական պատասխան տվեց: Մերի Մարգարյանի ամուսնու հարցին, թե 2015 թվականի հուլիսի 27-ին, ըստ Բախշյանի, ինքն ի՞նչ չի արել.«Կամ, եթե հետ տայինք ժամանակը, ապա ինչ կանեիք»: «Նույնը, նույնը կանեի: Ուղղակի շաբաթ ու կիրակի օրերին կգնայի հիվանդանոց, բայց տակտիկական ոչ մի փոփոխություն չէր լինի»,- ասաց Բախշյանը: Տուժողի իրավահաջորդի ներկայացուցիչ Մարինե Թովմասյանի հարցին, թե իր ունեցած չորս ամյա կրթությունն ու վեց ամսվա մանկաբարձական փորձն իրեն իրավունք տալիս էր նան հղիություն վարել, Բախշյանը նկատեց.«Մամուլի համար հարցեր մի տվեք: Նախ, ես ավարտել եմ Երևանի Մխիթար Հերացու անվան պետական բժշկական համալսարանը, և ոչ պետական բուհ չեմ ավարտել: Մի քիչ գոնե խորանայիք և տեսնեիք, որ այն ժամանակ, երբ ես սովորել եմ, չորսամյա կրթություն չկար: Կրթությունը յոթամյա էր: Բացի այդ, իմ ունեցած փաստաթղթերն ու վկայականները ինձ թույլ են տալիս զբաղվել իմ գործով»։