Հայաստանում սեքս կա, թե՞ չկա. Նիկոլ Փաշինյանը՝ Տիգրան Մուկուչյանին

Այսօր ԱԺ-ում քննարկվում է «Կենտրոնական ընտրական հանձնաժողովի գործունեության մասին» հաղորդումը: «Ելք» խմբակցության ղեկավար Նիկոլ Փաշինյանը, դիմելով ՀՀԿ-ականներին, նշեց,որ նրանք սիրում են անընդհատ կրկնել, թե իրենք ստացել են ժողովրդի վստահության քվեն, և առաջարկեց հասկանալ, թե ինչ և ինչպես են ստացել ՀՀԿ-ականները: «Երևանի ավագանու ընտրությունների նախընտրական քարոզարշավի վերջին օրը ահազանգեր ստացվեցին, որ ՀՀԿ բոլոր շտաբներում բաժանվում են ընտրակաշառքներ: Առաջին անգամն էր, երբ մեզ հաջողվեց ձեռք բերել կոնկրետ ապացույցներ»,- ասաց նա: Պատգամավորը հիշեցրեց, որ ընտրություններից առաջ ՀՀԿ-ի շտաբի տարածքում փաստաթղթեր էր հայտնաբերվել ընտրախախտումների մասին: «Էս փաստերն ինչի՞ չեք քննել, օրինակ հանձնաժողովը, որտեղ ՀՀԿ-ի կողմից ընտրակաշառք բաժանելու ապացույցներ կան: Օրինակ Փաստաթղթերից մեկից իմանում ենք, որ 4/01 ընտրական տեղամասի պատասխանատու Հովհաննես Գլաստյանը 6 մլն 250 հազար դրամ է ստացել՝ 600 կողմ ձայն ապահովելու համար, 4/15 տեղամասի պատասանատու Մինաս Շահինյանը  6 մլն 250 հազար դրամ է ստացել՝ 600 ձայն ապահովելու համար»,- հարցրեց Նիկոլ Փաշինյանը: ԿԸՀ նախագահ Տիգրան Մուկուչյանը հայտարարեց, որ իրավապահները դրանց հետ կապված քննություն են կատարում: Նիկոլ Փաշինյանն էլ նշեց, որ ընդդիմադիրները տեսնում են վարչական ռեսուրսի չարաշահման խնդիր, իսկ ԿԸՀ-ն դա չի տեսնում: «Հիմա ասում եք՝ փաստաթղթի պծիչկեն ճիշտ չի դրած, այս բանը ճիշտ չի դրած, բայց հիմա դուք կարո՞ղ եք ասել, ի վերջո ՀՀ-ում սեքս կա՞, թե՞ չկա, նկատի ունեմ՝ ընտրակաշառքը եւ վարչական ռեսուրսի չարաշահումը: Եթե հայտարարում եք, որ չկա, մենք դա կընդունենք որպես ի գիտություն»: