«Մնում է դիմել Մայր աթոռ՝ գոնե սկզբի համար 330 դատախազի սրբերի կարգը դասելու համար»
ԱԺ-ում «Ծառուկյան» խմբակցության պատգամավոր Նաիրա Զոհրաբյանը հայտարարեց, որ հաշվետվությունների ժամանակ շատ տարօրինակ հայտարարություններ են հնչում ամբիոնից: «Ես չգիտեմ՝ ուլտրամանուշակագույն ճառագայթների բարձր ինդեքսից է, թե ջրմային ֆոնի բարձր պրեսինգից է դա,- ասաց նա՝ հիշեցնելով, որ գլխավոր դատախազը հայտարարել է, որ դատախազության ոլորտում կոռուպցիոն ռիսկերը զրոյացված են:- Այսինքն՝ մենք՝ ի դեմս 332 դատախազների, ունենք սրբադասության հավակնորդների: Մնում է դիմել Մայր աթոռ՝ գոնե սկզբի համար 330 դատախազի սրբերի կարգը դասելու համար»: Պատգամավորի խոսքով՝ ԿԸՀ նախագահի հաշվետվությունը նույնիսկ ջերմոցային, իդեալական միջավայրի վերաբերյալ էր. «Պարոն Մուկուչյան, պետք չէ այստեղ որևէ կառույցի ղեկավար հագնի սրբի վեղար և հայտարարի, որ իր կառույցում ամեն ինչ իդեալական է: Ո՞ւմ հայտնի չէ, որ մեր երկրում կա տոտալ անվստահություն ընտրական գործընթացների հանդեպ, որ իշխող կուսակցությունը բոլոր ժամանակներում օգտագործել և օգտագործում է վարչական ռեսուրսը»: Ըստ նրա՝ ռեյտինգային համակարգը բացարձակ ապաքաղաքական համակարգ է և պետք է մտածել այդ ընտրակարգը փոխելու մասին: «Ինչքան էլ փորձենք շտկել, քանի դեռ գործում է՝ հաղթողին ամեն ինչ, պարտվողին ոչինչ, այս վիճակն է մնալու»,-նկատեց նա:
Հետևեք մեզ Viber-ում
