Խոսիր Նիկոլ, «ՀԱՊԿ-ում հարց լուծող» ու հին «վոժդերին» սովորեցնող

Մի քանի օր է, ինչ սահմանին կրկին լարված իրավիճակ է: Հայկական կողմը երեք հայտնեց երեք զոհի մասին, ադրբեջանականը` մեկ զոհի: Երեկ սահմանին ինտենսիվ փոխհրաձգություն էր:

Այսօր արդեն Նիկոլ Փաշինյանը հեռախոսազրույց է ունեցել Ռուսաստանի նախագահ Վլադիմիր Պուտինի Հետ: «Հաշվի առնելով ՀԱՊԿ-ում Հայաստանի նախագահությունը՝ կարծիքներ են փոխանակվել Ղազախստանում ՀԱՊԿ խաղաղապահ գործողության ընթացքի վերաբերյալ։ Նշվել են խաղաղապահ զորակազմի արդյունավետ համակարգված գործողությունները, որոնք նպաստում են հանրապետությունում իրադրության կարգավորմանը», - հաղորդում է Կրեմլի մամլո ծառայությունը։ Աղբյուրի համաձայն՝ Վլադիմիր Պուտինն ու Նիկոլ Փաշինյանը քննարկել են նաև Լեռնային Ղարաբաղի շուրջ առկա իրավիճակը և Ռուսաստանի, Ադրբեջանի ու Հայաստանի ղեկավարների` 2020թ. նոյեմբերի 9-ի, 2021թ. հունվարի 11-ի և նոյեմբերի 26-ի հայտարարություններում ամրագրված պայմանավորվածությունների իրականացման որոշ հարցեր։ Պուտինն ու Փաշինյանը պայմանավորվել են շարունակել շփումները տարբեր մակարդակներում։

Հայկական կողմը ևս հաղորդում է, որ զրուցակիցները քննարկել են Լեռնային Ղարաբաղի շուրջ ընթացիկ իրավիճակը և եռակողմ հայտարարություններով ձեռք բերված պայմանավորվածությունների կատարմանը վերաբերող հարցեր, անդրադարձ է կատարվել Ղազախստանում ՀԱՊԿ խաղաղապահ առաքելության գործունեությանը։

Վարչապետի աշխատակազմի լրատվականն այլ մանրամասներ չի փոխանցում։
Երկու օրից Հայաստանի ու Թուրքիայի ներկայացուցիչները հայ-թուրքական հարաբերությունների կարգավորման ուղղությամբ առաջին հանդիպումն են անցկացնելու: Ու հիմա Թուրքիան Ադրբեջանի միջոցով Փաշինյանի իշխանությանը հասկացնում է, որ իրենց հետ բանակցելու են «վիզը ծռած» խեղճի կարգավիճակով, այսինքն՝ Հայաստան պետությունը պետք է լինի՝ Նիկոլ Փաշինյանի հոգեբանությամբ՝ պարտված ու խեղճ, ոչ թե այնպիսին, ինչպիսին օրեր առաջ փորձեն իրեն ներկայացնել՝ Փաշինյանը, թե ՀԱՊԿ-ում մի քանի ժամում «հարց լուծող» է դարձել՝ ՀԱՊԿ-ում նախագահող Հայաստանի վարչապետը:

Դե վճռական քայլի դիմիր, Փաշինյան, ՀԱՊԿ-ում ղեկավարող երկիր ես, ո՞ւր են ՀԱՊԿ-ի զորքերը, ինչո՞ւ են ՀՀ տարածք ներխուժած ադրբեջանական ստորաբաժանումներին դուրս շպրտում մեր երկրից:

Իսկ տեսնո՞ւմ է ինչ լեզվով են հայ-թուրքական բանակցություններից 2-3 օր առաջ իր հետ «խոսում» թուրքերը...

Այսօր հեռախոսազրույց են ունեցել Թուրքիայի և Ադրբեջանի պաշտպանության նախարարները։ Հուլուսի Աքարը Զաքիր Հասանովին հավաստիացրել է, որ «Թուրքիայի զինված ուժերը, ինչպես միշտ, Ադրբեջանի կողքին են»։

Ո՞վ է Փաշինյանի իշխանության դաշնակիցը... Ղազախստանի՞, թե՞ Բելառուսի նախագահները, որոնք շնորհավորել են Ալիևին՝ Ադրբեջանի տարածքային ամբողջականությունը վերականգնելու ու «պատմական արդար հաղթանակի» համար:

Մետաքսյա Շալունց