Ռոբերտ Քոչարյանը ճիշտ էր, Սերժ Սարգսյանը՝ սխալ․ Նիկոլ Փաշինյանի ուշացած խոստովանությունը

Զորք ուղարկելով Ղազախստան՝ Փաշինյանն ընդունում է, որ 2008-ի մարտի 1-ին իշխանությունները ճիշտ էին, իսկ ինքը՝ հանցագործ։

Ֆեյսբուքի իր էջում նման գրառում է արել ՀՀԿ փոխնախագահ, ԱԺ նախկին փոխնախագահ Էդուարդ Շարմազանովը։
Համաձայնելով պարոն Շարամազանովի այս խիստ իրավացի պնդմանը՝ անհրաժեշտ է կատարել դետալային, բայց շատ կարևոր լրացում։ Զորք ուղարկելով Ղազախստան՝ Նիկոլ Փաշինյանը փաստում է, որ որ 2008-ի մարտի 1-ին Ռոբերտ Քոչորյանը ճիշտ էր, իսկ 2018 թվականի ապրիլին Սերժ Սարգսյանը՝ սխալ, քանի որ Նիկոլ Փաշինյանի դեմ զորք չհանեց, հարևան և գործընկեր երկրներից օգնություն չխնդրեց։ Ինքը՝ Նիկոլ Փաշինյանը, երկու դեպքում էլ հանցավոր գործունեությամբ էր զբաղված։ Ի դեպ, 2008 թվականի Մարտի 1-ի հանցագործությունների համար Նիկոլ Փաշինյանը, դատարանի որոշմամբ, մեղավոր է ճանաչվել և դրա համար դատապարտվել ազատազրկման։

Այլևս անվիճելի է, որ 2008-ին իշխանության այն ժամանավա պատասխատու Ռոբերտ Քոչարյանը կարողացավ պետականությունը պաշտպանելու համարձակություն ու քաղաքական կամք դրսևորել, ինչը չկարողացավ անել 2018 թվականին պետության ղեկին գտնվող Սերժ Սարգսյանը, որի հետևանքով մենք ստացանք ազգային աղետ՝ ի դեմս Փաշինյանի նման ղեկավարի։ Զորք ուղարկելով Ղազախստան՝ Փաշինյանը նաև լրացուցիչ անգամ հաստատեց, որ եթե հանկարծ Հայաստանում կրկին զանգվածները դուրս գան փողոց, և ընդդիմադիր ուժերը փորձեն ամբոխի ճնշման տակ իրենից իշխանություն վերցնել, ինքն առանց վարանելու ոչ միայն Հայաստանի զորքը կհանի հայ ժողովրդի դեմ, ոչ միայն աջակցություն կխնդրի ՀԱՊԿ անդամ երկրներից, այլև մեծագույն սիրով Հայաստան կհրավիրի թուրք ասկյարներին, որպեսզի պաշտպանի սեփական իշխանությունը։

Զորք ուղարկելով Ղազախստան՝ Նիկոլ Փաշինյանը կրկին և վերստին ապացուցեց, որ հեղափոխությունն իր համար ոչ թե քաղաքական, գաղափարական կամ բարոյական արժեք է, այլ ընդամենը իշխանություն զավթելու միջոց։ Հակառակ պարագայում հեղափոխական Նիկոլ Փաշինյանը ոչ մի պարագայում չէր կարող հայկական զորամիավորում ուղարկել Ղազախստան՝ ճնշելու այդ երկրում տեղի ունեցող հեղափոխությունը։ Նիկոլ Փաշինյանն իրավունք չուներ հայ զինվորին դարձնել ղազախ ժողովրդի թշնամի, հատկապես որ նա իր այդ քայլով վտանգի է ենթարկում նաև Ղազախստանում ապրող հայերին, որոնք կարող են որպես դավաճան վռնդվել այդ երկրից՝ զրկվելով իրենց գույքից ու սեփականությունից։

Նիկոլ Փաշինյանը պարտավոր է նաև վերադարձնել ՀՀ պետական բյուջեից Մարտի 1-ի իրադարձությունների ժամանակ տուժած ակտիվիստներին վճարված հատուցման գումարները, որովհետև զորք ուղարկելով Ղազախստան՝ Նիկոլ Փաշինյանն ընդունեց, որ նրանք ոչ թե տուժած ակտիվիստիներ են, այլ պետական կարգը խախտող հանցագործներ։ Այդ գումարները պետք է տրվեն պետական կարգը պահպանած ոստիկաններին։

Եվ վերջապես․ այսքանից հետո Նիկոլ Փաշինյանը պարտավոր է ներողություն խնդրել Ռոբերտ Քոչարյանից՝ նրա դեմ սահմանադրական կարգի տապալման կեղծ հոդվածով գործ հարուցելու և ապօրինի կալանքի տակ պահելու համար։ Ընդհանրապես Մարտի 1-ի գործով դատավարությունը կարճելու միջնորոդություն ներկայացնելը Նիկոլ Փաշինյանի համար հետագայում կարող է դիտվել մեղմացուցիչ հանգամանք։

Հայկ Դավթյան