Նալբանդյանը երեւի հասկացել է, որ ինքը այս երկրի արտգործնախարարն է
Հուլիսի 4-ին կրկին սրվել է Արցախի և Ադրբեջանի հակամարտ զորքերի շփման գիծը, տարբեր հատվածներում հակառակորդը շարունակել է խախտել հրադադարի պահպանման ռեժիմը: Ադրբեջանական կողմը կիրառել է ականանետ, հաստոցավոր հակատանկային, այն զինատեսակները, ինչը կիրառել է ապրիլյան քառօրյա պատերազմի օրերին: Հակառակորդի նախահարձակ ակտիվությունը ճնշելու համար ՊԲ առաջապահ զորամասերը ստիպված են եղել ձեռնարկել պատասխան գործողություններ, ինչի արդյունքում վնաս է հասցվել Ալխանլու գյուղում տեղակայված կրակակետին: Հակառակորդն ունի կորուստներ, որոնց թվում երկու տարեկան երեխա: Ադրբեջանական սադրիչ գործողությունների արդյունքում ՊԲ-ն կորուստներ չի ունեցել: Ուշագրավ է, որ հերթական լարումն արժանացել է Հայաստանի Հանրապետության արտաքին գործերի նախարար Էդվարդ Նալբանդյանի ուշադրությանը, վերջինս ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ հեռախոսազրույցներում խոսել է Ադրբեջանի ձեռնարկած սադրանքի և դրա հետևանքների մասին: ԵԱՀԿ Մինսկի խմբի համանախագահները եւս հայտարարություն են տարածել: Քաղաքագետ Լեւոն Շիրինյանը նկատում է, որ հայտարարության մեջ տեղայնացվում է խնդիրը եւ կոնկրետ մատնանշում Ֆիզուլիի շրջանի Ալխանլու գյուղը.<<Համանախագահները կոնկրետ շեշտել են Ալխանլու գյուղի շուրջ տեղի ունեցող գործողությունները, իսկ դա նշանակում է, որ հարցն ինքնին խեղաթյուրում են: Որովհետեւ ստացվում է, որ հայկական կողմը կոնկրետ նշված գյուղում ինչ-որ գործողություններ է արել, մինչդեռ հայկական կողմը ընդամենը պատասխանել է ադրբեջանական սադրանքին: Ստացվում է, որ համանախագահների արձագանքը ոչ ադեկվատ է, ոչ օբյեկտիվ>>,- նշեց Շիրինյանը: Քաղաքագետի խոսքով, հերթական սադրանը ադրբեջանական քաղաքականության ուղեծրում է եւ նման գործողությունները ըստ նրա՝ մեկ նպատակ են հետապնդում՝ հակառակ կողմին պարտադրել պարտվողականություն.<<Սա կոչվում է հակառակորդի հյուծման, մաշելու քաղաքականություն: Տեսնում ենք տարիներով սահմանային գոտիներում առաջանում է վիճակ, արտագաղթ, այս տրամաբանության մեջ է նրանց քաղաքականությունը>>,- վստահեցնում է քաղաքագետ Շիրինյանը և միեւնույն ժամանակ նկատում, որ այս անգամ հայկական կողմը բավականին ակտիվ է արձագանքել խնդրին, երեւան է եկել անգամ ԱԳ նախարարը.<<Նալբանդյանն ինչու է ակտիվացել, որովհետեւ երեւի հասկացել է, որ ինքն այս երկրի արտգործնախարարն է>>: Լեւոն Շիրինյանը, ի դեպ, Մինսկի խմբի համանախագահների հայտարարությունը բխեցնում է Ադրբեջանի հայտարարություններից, որտեղից համառորեն պնդում են, որ հայկական կողմը միտումնավոր թիրախավորել է խաղաղ բնակչությանը.<<Եթե այդ խումբը օբյեկտիվ լիներ, պետք է հարցներ՝ ոճրագործը, որը նախահարձակ է եղել եւ դա Ադրբեջանն է, ինչու՞ է մարտկոցը տեղադրել բնակավայրում: Հավանաբար այդ գյուղում ադրբեջանցիներ չան, այլ թալիշներ, կամ մեկ ուրիշ ազգ, ամեն դեպքում ինքն է իր ժողովրդին թիրախ դարձրել: Հնարավոր չէ ռազմական գործողություն իրականացնել բնակավայրում եւ ոչ մեկին ոչինչ չպատահի>>:Լեւոն Շիրնյանի խոսքով՝ Ադրբեջանի քաղաքականության <<դրդիչը>> հայկական կողմի դիրքորոշումն է.<<Երբ հայկական կողմն անընդհատ փոխզիջումներից է խոսում եւ անընդհատ խաղաղությունից է խոսում, ու որ ինքը պատրաստ է ստորագրել եւ այլն, կարծրացնում է նրանց դիրքորոշումը: Երբ այստեղից ասում են, որ տարածքը տալիս ենք, նրանք էլ հո հարիֆ չեն, իրենց էլ դա է պետք>>: Անի Սահակյան
Հետևեք մեզ Viber-ում
