Վանեցյանի գործով՝ նոր, թե հին հանգամանքներ

 
Ազգային անվտանգության ծառայությունը հանցակազմի բացակայության հիմքով դադարեցրել է վարչապետի մահափորձը նախապատրաստելու համար մեղադրվող ԱԱԾ նախկին տնօրեն Արթուր Վանեցյանի նկատմամբ քրեական հետապնդումը։
Մեկ տարի տևած նախաքննության ընթացքում իրավապահները ձեռք չեն բերել բավարար ապացույցներ՝ հիմնավորելու առաջադրված մեղադրանքը:

Դեռ մեկ տարի առաջ Վանեցյանին, ինչպես նաեւ ՀՀԿ-ական Վահրամ Բաղդասարյանին, «Սիսական» ջոկատի հրամանատար Աշոտ Մինասյանին դատարանները հրաժարվել էին կալանավորել հիմնավոր կասկածի բացակայության պատճառաբանությամբ։ Իշխանականներն այդ օրերին վայնասուն էին բարձրացրել, թե ԲԴԽ- Ռուբեն Վարդազարյանի գլխավորությամբ սպասարկում է ընդդիմությանը, այս գործը կարելի է ասել ճակատագրական դարձավ Վարդազարյանի համար ու նրան փոխարինեցին Ջհանգիրյանով: Վերադառնալով բուն թեմային՝ մեկ տարի առաջ աղմկահարույց այս քրեական գործի մասին հայտնելիս ԱԱԾ-ն նաև հեռախոսային զրույց էր հրապարակել, որտեղ, իրավապահների պնդմամբ, մեղադրյալները քննարկում էին վարչապետի սպանության և դրա իրականացման տարբերակները։
Սակայն ակնհայտ էր, որ աղետալի պատերազմից ու պարտությունից հետո Փաշինյանի թիմը այդպիսի շինծու գործերով փորձում էր պահել իշխանությունը, վախեցնել ընդդիմադիրներին, մինչեւ վերջերս էլ խորհրդարանում թե Փաշինյանը, թե ՔՊ-ական ուսապարկերը քանիցս շահարկել են այդ թեման՝ ի պատասխան ընդդիմադիրների քննադատությանը ասել, որ ԱԺ-ում ուժեղացված ծառայությունը միտված է իրենց անվտանգությանը եւ որ իբր խորհրդարաի դահլիճում կան մարդիկ, որոնք վարչապետի դեմ մահափորձ են կազմակերպել:
Առաջին հայացքից տրամաբանական որոշում է կայացվել, դադարեցվել է Վանեցյանի նկատմամբ քրեական հետապնդումը, բայց մյուս կողմից զարմանալի է, թե իշխանությունն ինչու է հապաղում Հայաստան դաշինքի մի խումբ պատգամավորների հարցում, որոնք նույնկերպ քաղաքական հետապնդումների զոհ են դարձել եւ նրանց նկատմամբ քրեական հետապնդում է հայտարարված: Անցած շաբաթ դաշինքը հայտարարեց նաեւ ԱԺ միջազգային պատվիրակություններում իր գործունեությունը դադարեցնելու մասին, քանի դեռ իշխանությունը չի հանել քրեական գործերով անցնող իրենց պատգամավորների նկատմամբ երկրից դուրս գալու արգելքը: Բայց ձայն բարբառո հանապատի: Իշխանությունը իր կոմֆորտի զոնայում է, գործուղումներին միայնակ է գնում, առանց ընդդիմադիր պատգամավորների, թեեւ պետք է լիներ հակառակը,իշխանությունը պետք է շահագրգռված լիներ, որ փորձառու ընդդիմադիրները միջազգային կառույցներում պաշտպանեին Հայաստանի պետական շահը եւ ընդդեմ Ադրբեջանի գործունեություն իրականացնեին:

Նիկոլ Փաշինյանի իշխանությունը, ակնհայտ, է որ առաջնորդվում է այլ սկզբունքներով, կարելի է նաեւ հասկանալ, թե ինչով է պայմանավորված Վանեցյանի նկատմամբ այսպիսի մեծահոգությունը, չմոռանանք, որ ի պաշտոնե ԱԱԾ նախկին տնօրենը Փաշինյանի վերաբերյալ գաղտնի փաստաթղթերի է տիրապետում, նա եղել է Ալիեւի հետ ուղիղ կապի կազմակերպիչը եւ այլն:

Անի Սահակյան