Անչափահասի կողմից վրաերթի ենթարկված 24-ամյա երիտասարդը հիվանդանոցում գիտակցության չգալով մահացել է. ՖՈՏՈՌԵՊՈՐՏԱԺ, ՏԵՍԱՆՅՈՒԹ

SHAMSHYAN.com-ի տեղեկություններով հուլիսի 6-ին, հիվանդանոցում մահացել է հունիսի 26-ին, Երևանում Vaz 21723 մակնիշի ավտոմեքնայի վարորդի կողմից վրաերթի ենթարկված և ծայրահեղ ծանր վիճակով հիվանդանոց տեղափոխված 24-ամյա Գագիկ Մարգարյանը: Ինչպես հայտնում է ֆոտոլրագրող Գագիկ Շամշյանը, փաստի առթիվ ՃՈ ճանապարհատրանսպորտային պատահարների գործերով հետաքննության և վարչական վարույթի իրականացման բաժանմունքի հետաքննիչ Գևորգ Խանաղյանի կողմից նախապատրաստված նյութերը փոխանցվել են Հայաստանի քննչական կոմիտեի Երևան քաղաքի քննչական վարչություն, որտեղ փաստի առթիվ հարուցվել է քրեկան գործ ՀՀ Քր-Օրի 242 հոդվածի 2-րդ մասի հատկանիշներով: Գ. Շամշյանի տեղեկություններով ոստիկանության Նոր Նորքի բաժնի ծառայողները բաժնի պետ Արմեն Գասպարյանի գլխավորությամբ պարզել էին, որ մինչև վրաերթը Lada-ի վարորդը, ով անչափահաս է եղել, բախվել է Mercedes-ին: Նոր Նորքի ոստիկանները հայտնաբերել են նաև վթարված Mercedes-ը: Հիշեցնենք, որ հունիսի 26-ին, խոշոր ավտովթար էր տեղի ունեցել Երևանում: Ժամը 19:00-ի սահմաններում Մոլդովական փողոցում՝ թիվ 48 շենքի դիմաց, Lada Priora մակնիշի 20 MM 101 համարանիշի ավտոմեքենայի վարորդը, կորցնելով մեքենայի կառավարումը, բախվել էր մայթի եզրաքարերին և երկաթե մի քանի սյուների: Ինչպես ավելի վաղ հայտնել էր ֆոտոլրագրող Գագիկ Շամշյանը, վթարի հետևանքով 2 հոգու ծայրահեղ ծանր վիճակով տեղափոխել էր «Սուրբ Գրիգոր Լուսավորիչ» բժշկական կենտրոն: Դեպքի վայր էին ժամանել Ճանապարհային ոստիկանության 1-ին սպայական գումարտակի 7-րդ դասակի աշխատակիցները: Օպերատիվորեն դեպքի վայր էին ժամանել նաև ՀՀ Արտակարգ իրավիճակների նախարարության փրկարար ծառայության հրշեջ-փրկարարները՝ 1 մարտական հաշվարկով: Հրշեջ-փրկարարները հոսանքազրկել էին ավտոմեքենան, փակել գազի բալոնի փականը: Վթարի մասին ՃՈ օպերատիվ կառավարման կենտրոնի պատասխանատու հերթապահ Արսեն Հարությունյանը տեղեկությունը փոխանցել էր ՃՈ ճանապարհատրանսպորտային պատահարների գործերով հետաքննության և վարչական վարույթի իրականացման բաժանմունք, որտեղից ժամանել էին հետաքննիչ Գևորգ Խանաղյանը, ում կողմից փաստի առթիվ նյութեր էին նախապատրաստվել: Դեպքի վայրում հավաքվածներն ասում էին, որ մեքենան պատկանել է այլ մարդու, ով այն թողած է եղել արհեստավորի մոտ, իսկ մյուս վիրավորը հնարավոր է՝ հետիոտն լինի: Ոստիկանությունն ու ՃՈ հետաքննչական բաժանմունքը պարզում էին վարորդի և վիրավորի ինքնությունը։ Լուսանկարները և տեսանյութը՝ Սմբատ Պետրոսյանի