Թուրքիան ու Ադրբեջանը կարող են օգտվել ՀՀ ճանապարհներից. Չքողարկված բացահայտում
Հայկական կողմը պատրաստ է այցելել ինչպես Բաքու, այնպես էլ Անկարա՝ քննարկելու տարածաշրջանային խնդիրները, երեկ Հայաստանի հանրային հեռուստաընկերությանը տված հարցազրույցում ասել է Անվտանգության խորհրդի քարտուղար Արմեն Գրիգորյանը։ Նա նշել է, որ հայ-թուրքական հարաբերությունների քննարկումը Հայաստանը տեսնում է երկկողմ ձևաչափով, բայց, եթե առիթ լինի այս հարցը քննարկելու «3+3» ձևաչափով, ևս կօգտագործվի այդ առիթը։ «Անհրաժեշտության դեպքում, մենք պատրաստ են մեկնել Անկարա, և Բաքու, ինչպես նաև ընդունել այս երկրների պատվիրակություններին Երևանում», - ասել է Գրիգորյանը։
Սա դեռ ամենը չէ...
ԱԽ քարտուղար Արմեն Գրիգորյանը երեկ «պարզաբանում» է տվել «միջանցքային» հարցի շուրջ, և ինչպես կարելի էր ենթադրել, հայկական կողմը կարող է «Միջանցքի» անվանումը փոխել, բայց բովանդակությունը մնալ նույնը...
«Մենք բազմիցս հայտարարել ենք, որ միջանցքի մասին ցանկացած քննարկում մեզ համար «կարմիր գիծ» է։ Հայաստանը երբեք չի քննարկել, չի քննարկում և չի քննարկելու միջանցքի վերաբերյալ որևէ հարց։ Եթե միջանցքներ ասելով Թուրքիան նկատի ունի Հայաստանի ճանապարհները որպես ՀՀ սուվերեն տարածք օգտագործելը, ապա մեր մոտեցումները համընկնում են», ասել է Արմեն Գրիգորյանը։
Այլ կերպ ասած՝ պաշտոնական Երևանը ՀՀ ինքնիշխանության-իրավասության համատեքստում պրոբլեմ չի տեսնում, որ Թուրքիան ու Ադրբեջանն օգտվել ՀՀ ճանապարհներից:
Այսինքն, ենթադրենք, մի կետում ՀՀ անցակետը ստուգում է իրականացնում, մինչև մյուս կետ հասնելը՝ թուրքական, ադրբեջանական բեռնափոխադրողները, ավտոմեքենաները ազատ են լինելո՞ւ ՀՀ տարածքում ինչ ցանկանան, անե՞ն...
Նկատենք, որ հարևան Իրանը դեռ շարունակում է բավական անհանգստացած լինել Հայաստանի տարածքային ամբողջականության խախտման հարցով: Հայաստանի գործընկերների հետ հանդիպումներում Թեհրանը պարտադիր շեշտում է Իրանի համար «կարմիր գծերի» սահմանները՝ հստակ մտավախություն ունենալով, որ Հայաստանի ներկայիս իշխանությունը կարող է խնդրահարույց վիճակ ստեղծել նաև Իրանի համար:
Բազմաթիվ հրապարակումներ են եղել միջազգային մամուլում, որ Ադրբեջանի բարեկամական երկիր Իսրայելը կարող է Ադրբեջանի տարածքն օգտագործել ընդդեմ Իրանի գործողությունների, և այս վտանգը մինչև հիմա գոյություն ունի:
ԱԽ քարտուղար Արմեն Գրիգորյանը երեկ հանդիպել է ԻԻՀ Մեջլիսի Իրան-Հայաստան պատգամավորական բարեկամության խմբի անդամներին: Իրանի Իսլամական Հանրապետության խորհրդարանի Ազգային անվտանգության և արտաքին քաղաքականության մշտական հանձնաժողովի անդամ Մահմուդ Ահմադի Բիղաշն իր խոսքում կարևորել է Հարավային Կովկասի դերը ԻԻՀ համար:
Մասնավորապես ընդգծել է, որ տարածաշրջանային կայունությունն ու անվտանգությունը, սահմանների անխախտելիությունն Իրանի համար կարմիր գծեր են և Թեհրանը չի հանդուրժի տարածաշրջանում որևէ տարածքային փոփոխություն: Արմեն Գրիգորյանն էլ իր հերթին նշել է Հայաստանի կարմիր գծերը, ինչպես նաև ընդգծել Հայաստանի կողմից ավելի վաղ առաջ քաշված «խաղաղության դարաշրջան» սկսելու հրամայականը, որը նաև համընկնում է Իրանի արտաքին քաղաքականության առաջնահերթությունների հետ: ԱԽ քարտուղարը նաև կարևորել է Երևան-Նախիջևան-Ջուլֆա երկաթգծի գործարկումը՝ ընդգծելով, որ այն բերելու է տարածաշրջանի երկրների տնտեսական զարգացման:
Մետաքսյա Շալունց
Հետևեք մեզ Viber-ում
