Դատախազը բացահայտում է, թե ինչն է զրոյացվել
Այսօր ԱԺ-ում ՀՀ գլխավոր դատախազ Արթուր Դավթյանը ներկայացրեց դատախազության 2016 թվականի գործունեության մասին հաղորդումը։ «Ծառուկյան» դաշինքի պատգամավոր Նաիրա Զոհրաբյանը հետաքրքրվեց, թե կոռուպցիայի առումով ի՞նչ վիճակ է դատական համակարգում. «Ես շարունակում եմ ստանալ բազում նամակներ, որոնց գերակշիռ մեծամասնությունը դատարաններում կոռուպցիոն երևույթներին է վերաբերում: Ինձ հետաքրքրում է կոռուպցիան ձեր համակարգում: Մենք նաև ԵՄ հորդորով բարձրացրինք դատավորների, դատախազների թոշակները, նպատակն այն էր, որ համակարգում կոռուպցիան նվազի»,- Գլխավոր դատախազին դիմեց պատգամավորը: «Կոնկրետ Դատախազության համակարգում կոռուպցիոն երևույթների ռիսկայնությունը զրոյացված է։ Ես վստահորեն եմ դրա մասին հայտարարում։ Ոչ մեկս չենք կարող երաշխավորել, որ 337 դատախազից որևէ մեկը որևէ մի օր չի կարող ներգրավվել դրա մեջ, բայց մի բան խոստանում եմ՝ եթե որևէ մեկի դեպքում այդ հանգամանքը կբացահայտվի, օրենքի խստագույն պատասխանատվությանը նա կենթարկվի»,- ի պատասխան՝ ասաց Արթուր Դավթյանը։ Հարցին, թե ինչպե՞ս դատախազության համակարգում կոռուպցիա չկա, Դավթյանը պատասխանեց. «Ես չասացի, որ զրոյացվել է կոռուպցիան մեր համակարգում, ես ասացի՝ զրոյացվել են դրա ռիսկերը»:
Հետևեք մեզ Viber-ում
