Աճել է սպանությունների բացահայտման ցուցանիշը. գլխավոր դատախազ

ԱԺ-ում Գլխավոր դատախազության 2016 թվականի գործունեության մասին հաղորդումը ներկայացնելիս գլխավոր դատախազ Արթուր Դավթյանն ասաց, որ 2016թ. ընթացքում գրանցվել է հանցագործության 18 764 դեպք՝ նախորդ տարվա 17 043-ի փոխարեն, այսինքն՝ դեպքերն աճել են 1721-ով կամ 10.1%-ով, սակայն բացահայտումն աճել է 2.8%-ով:2016թ. հանցավորության ընդհանուր կառուցվածքում աճել են միջին ծանրության և առանձնապես ծանր հանցագործությունները, իսկ ծանր հանցագործության դեպքերը նվազել են: 2016թ. նախորդ տարվա համեմատությամբ նվազել են մարդու դեմ ուղղված հանցագործությունների դեպքերը: 2016թ. հանցագործություն կատարած 293 անձ եղել է նախկինում դատապարտված, որոնցից 143-ը՝ 2 և ավելի անգամ: 2016թ. գրանցվել է մարդու դեմ ուղղված հանցագործության 4895 դեպք, որը նախորդ տարվա համեմատ նվազել են 78-ով կամ 1.6%-ով: Ընդ որում, նվազել են բռնաբարության ու բռնաբարության փորձի դեպքերը (39-ից 25) և անձի դեմ ուղղված այլ հանցագործությունները (3663-3517): 2016թ. նախորդ տարվա համեմատությամբ աճել է սպանությունների բացահայտման ցուցանիշը՝ կազմելով 75.8%` նախորդ տարվա 71.2%-ի դիմաց: Սպանության 66 դեպքից բացահայտվել է 50-ը, նախորդ տարի 52 դեպքից բացահայտվել էր 37-ը: