Նիկոլ Փաշինյանը քաղաքական հրահանգ է տվել Արմեն Չարչյանի գործով
«Հայաստան» դաշինքի խորհրդարանական խմբակցության երեք պատգամավորներն ազատ կարձակվեն: Այս մասին ասված է դաշինքի տարածած հայտարարությունում:
«Քիչ առաջ Սահմանադրական դատարանը հրապարակեց պատգամավորների անձեռնմխելիության վերաբերյալ որոշումը: Սահմանադրական դատարանը, ըստ էության, արձանագրեց, որ անազատության մեջ գտնվող պատգամավորի կարգավիճակ չունեցող անձը պատգամավորի կարգավիճակ ձեռք բերելու պահից չի կարող պահվել անազատության մեջ: Սահմանադրական դատարանի այս որոշումից հետո անհապաղ պետք է փոխվի մեր երեք գործընկերների՝ Արմեն Չարչյանի, Մխիթար Զաքարյանի և Արթուր Սարգսյանի խափանման միջոց կալանքը, և նրանք պետք է ազատ արձակվեն»,- նշված է հայտարարությունում:
«Հայաստան» խմբակցության պատգամավոր Արմեն Չարչյանի փաստաբան Էրիկ Ալեքսանյանը ՍԴ-ի որոշման հիմքով դատարանին միջնորդություն է ներկայացրել անհապաղ դատական նիստ հրավիրելու ու Չարչյանի խափանման միջոց կալանավորումը վերացնելու պահանջով։ Այս մասին Ալեքսանյանը հայտնել է Facebook-ում կատարած գրառման մեջ։ «ՀՀ Սահմանադրական դատարանը հրապարակեց որոշումը։ Այդ որոշման ուժով ՀՀ ԱԺ պատգամավոր Արմեն Չարչյանն անհապաղ պետք է ազատ արձակվի»,– գրել է նա։
Բարձր դատարանի իրականացրած սահմանադրական արդարադատությունը չի կարող անհետևանք մնալ, քանի որ ՍԴ որոշումները վերջնական են, դրանք ՀՀ դատական համակարգում չեն բողոքարկվում և ենթակա են անվերապահ կատարման։ Տեղի ունեցածը նաև պաշտոնական արձանագրում է առ այն, որ ամիսներ շարունակ ընդդիմադիր պատգամավորները ապօրինի կերպով պահվել են կալանքի տակ: Սա այն դեպքում, երբ Հայաստան խմբակցության պատգամավոր, պրոֆեսոր Արմեն Չարչյանն անգամ բանտարկության ռեժիմի հետ անհամատեղելի հիվանդություններ ուներ։
ՀՀ գլխավոր դատախազությունը, մեկնաբանելով Արմեն Չարչյանի պատգամավորական անձեռնմխելիության մասին հարցը, հայտարարել էր, թե Չարչյանի կալանքի վերաբերյալ որոշումը կայացվել է մինչև նրա պատգամավոր դառնալը, հետևաբար ՀՀ սահմանադրությամբ ամրագրված ԱԺ պատգամավորի անձեռնմխելիության իրավունքը նրա վրա չի տարածվում։
Նման պարզունակ, իրավաբանականություն գիտությանը հակասող մեկնաբանություն անելու տկարամտություն չէր ցուցաբերի անգամ իրավաբանության ֆակուլտետի առաջին կուրսի ուսանողը։ Հազիվ թե ՀՀ դատախազության քննիչներն ու Չարչյանի և մյուս պատգամավորների գործերը քննող դատավորները այս պարզ իրավական գիտելիքները չունեին։ Վստահաբար, որպես իրավաբան, նրանք շատ լավ գիտեին, որ պատգամավորը առանց ԱԺ մեծամասնության համաձայնության, չի կարող զրկվել անձեռնմխելիությունից։ Մինչդեռ գլխավոր դատախազությունը առանց ԱԺ միջնորդություն ներկայացնելու պահանջել է պատգամավորներին կալանավորել, ինչն ամբողջությամբ ապօրինի է, քանի դեռ դատարանի որոշմամբ նրանց մեղքն ապացուցված չէ, և չկա դատարանի որոշում՝ պատգամավորներին դատապարտելու մասին։
Մեծ խելք պետք չէ՝ հասկանալու համար, որ ընդդիմադիր պատգամավորները բանտարկվել և ամիսներ շարունակ մնացել են անազատության մեջ Նիկոլ Փաշինյանի անմիջական հրահանգով։ Այդքանով հանդերձ՝ դա պատգամավորների գործը քննող դատախազներին և դատավորներին չի ազատում պատասխանատվությունից։
Հայկ Դավթյան
Հետևեք մեզ Viber-ում
