Փաշինյանը հերթական յուրայինին կուղարկի՞ բանտ

Մամուլում, սոցցանցերում հերթական աղմուկն է բարձրացել Արագածոտնի վերջերս նշանակված մարզպետ Ռազմիկ Պետրոսյանի կեղծ դիպլոմի պատմության շուրջ:
Լրատվամիջոցներից մեկի իրականացրած հետաքննությամբ պարզվել է, որ Ապարանի նախկին քաղաքապետ, Ապարան ջոկատի հրամանատար, ազատամարտիկ Պետրոսյանը չունի բարձրագույն կրթություն, որը օրենքով պարտադիր է մարզպետի պաշտոնը զբաղեցնելու համար, ավելի ճիշտ ունի, բայց կեղծված դիպլոմ՝ տնտեսագետի մասնակցությամբ:

Այո, նորմալ երկրներում սա քրեական հանցագործության հիմք կհանդիսանար, իրավապահները հրապարակումը կընդունեին հաղորդում հանցագործության մասին ու գործի կանցնեին, սակայն Հայաստանում ամեն ինչ այնքան է բանը բանից անցել, որ հայրենիք հանձնածը, հազարավոր զոհեր, վիրավորներ, գերիներ, անհետ կորածների թիվ մեկ պատասխանատուն մնում է անպատիժ, ինչու պիտի մի դիպլոմ կեղծածը պատասխանատվության ենթարկվի: Իհարկե, չի բացառվում որ Ռազմիկ Պետրոսյանին ժերտվա տան, հաշվի առնելով, որ նախանցած տարի Նիկոլ Փաշինյանն իր բարեկամներից մեկի հետ կապված նման շոու սարքեց: 2019 թվականին ֆեյսբուքյան էջում գրեց, թե չի ուզում մազոխիստի տպավորություն թողնել, բայց տեղեկացնում է, որ իր անմիջական ցուցումով քրեական գործ է հարուցվել իր մի մերձավոր ազգականի թույլ տված ենթադրյալ չարաշահման փաստի առիթով: «Կասկած չկա, որ գործը լիարժեք կքննվի եւ մեղավորները կենթարկվեն օրենքով նախատեսված պատասխանատվության: Սա նոր Հայաստան է, եւ վարչապետի որեւէ մերձավոր չի կարող վեր լինել օրենքից կամ լինել արտոնյալ»:

Նիկոլ Փաշինյանի ազգական Մամիկոն Հովհաննիսյանը, ըստ ՀՀ քրեական օրենսգրքի 325-րդ հոդվածի 1-ին մասով հարուցված քրեական գործի՝ լինելով ՀՀ բնապահպանության նախարարության «Դիլիջան» ազգային պարկ ՊՈԱԿ-ի ինժեներ, 2019թ. փետրվար ամսին կադրերի բաժին ներկայացնելով Հայկական գյուղատնտեսական ինստիտուտը 1993թ. «գյուղատնտեսության մեքենայացում» մասնագիտությամբ ավարտելու եւ ինժեներ-մեխանիկի որակավորում ստանալու մասին դիպլոմի պատճե, նշանակվել էր նույն կազմակերպության փոխտնօրեն։ Տվյալներ էին ի հայտ եկել դիպլոմի՝ առերեւույթ կեղծված լինելու մասին:

Մյուս կողմից՝ Նիկոլ Փաշինյանը կադրային քաղաքականության հարցում երեք տարի շարունակ այնքան է մեղմ ասած չափերն անցել, որ Ռազմիկ Պետրոսյանը կարող է բունտ բարձրացնել: Ասենք Լիլիթ Մակունցին միայն անգլերենի իմացության համար նշանակել է կարեւորագույն պետությունում ՀՀ դեսպան, բանակում հանցանք գործած Պապիկյանին՝ Պն նախարար, 29 տարեկան պատանուն՝ փոխվարչապետ եւ այսպես շարունակ, իսկ ինքն ընդհանրապես դիպլոմ չունի, բայց վարչապետ է աշխատում: Ահա , սրանում է մեր երկրի դժբախտությունների ողջ պատճառը: Որ անգամ պատերազմից հետո էլ
Նիկոլ Փաշինյանը շարունակվում է առաջնորդվել նեղ թիմային, եւ ոչ թե պետական շահերով եւ <<Պոլի փետ լինի, քայլած լինի>> կամ իր հետ մի բան <<ծամած>> լինի գաղափարախոսությամբ:
Թվում էր, թե Նիկոլ Փաշինյանի վարչապետ դառնալուց հետո նախկին սխալները պետք է հաշվի առնվեին ու բացառվեին թայֆայական մոտեցումները: Սակայն վարչապետ դառնալու հենց առաջին օրերից ստացանք շատ ավելի վատ պատկեր: Հիմա թայֆայական ու թիմային գործոնը ոչ թե գերակայում է պրոֆեսիանոլին, այլ գրեթե 100 տոկոսով գործ ունենք թիմայինի հետ: Պաշտոնի եկան համատեղ քայլածները, գոռացողները, գըմփ-գըմփ-հո՛ւ անողները, ասֆալտին պառկածները, միասին ծամածները, փողոց փակածները, տնեցիները, բարեկամները, ծանոթները, ընկերները, սեփական վարասավիրները, դասատուները, քավորները, սրանց շներն ու կատուները՝ գիտելիքից ու փորձից զուրկ: Եվ այս բոլորի մոտ ընդհանուրն այն էր, որ նրանցից գրեթե բոլորը ունեին զրո պատկերացում պետական կառավարումից, ինչի հետեւանքն էլ Արցախի կորուստն էր:

Անի Սահակյան