Ձիթենու ճյուղերի «նվերը». Պուտինն ու Էրդողանը կամփոփեն Սոչիի արդյունքները

Սոչիի հանդիպումը արագ արդյունքներ է գրանցում, եռակողմ հանդիպման արդյունքում այսօր Մոսկվայում նախատեսված է փոխվարչապետների եռակողմ աշխատանքային խմբի հանդիպումը:

Փոխվարչապետ Մհեր Գրիգորյանի գլխավորած պատվիրակությունը դեկտեմբերի 1-3-ը գործուղվել է Մոսկվա՝ Հայաստանի, Ադրբեջանի և Ռուսաստանի փոխվարչապետների համանախագահությամբ եռակողմ աշխատանքային խմբի հանդիպմանը մասնակցելու նպատակով։ «Եվրասիական տնտեսական հանձնաժողովի խորհրդի նիստին, ԱՊՀ տնտեսական խորհրդի նիստին, Երկրորդ Եվրասիական համագումարին, ինչպես նաև Հայաստանի Հանրապետության, Ադրբեջանի Հանրապետության և Ռուսաստանի Դաշնության փոխվարչապետների համանախագահությամբ եռակողմ աշխատանքային խմբի հանդիպմանը մասնակցելու նպատակով 2021 թվականի դեկտեմբերի 1-3-ը Ռուսաստանի Դաշնություն (Մոսկվա) գործուղել պատվիրակություն»,- լրատվականներն այսօր հաղորդեցին վարչապետի որոշման մասին։

Հայկական պատվիրակությունը գլխավորում է փոխվարչապետ Մհեր Գրիգորյանը։ Պատվիրակության կազմում են նաև արտաքին գործերի նախարարի, տարածքային կառավարման և ենթակառուցվածքների նախարարի, էկոնոմիկայի նախարարի և պետական եկամուտների կոմիտեի նախագահի տեղակալները, ինչպես նաև պաշտպանության նախարարության և ազգային անվտանգության ծառայության մեկական ներկայացուցիչ։

Սոչիում երեք ժամանոց բանակցությունների արդյունքում Փաշինյանից, ինչպես երևում է, ստացել են հավաստիացումներ, որ դելիմիտացիայի և դեմարկացիայի պրոցեսն արագ պետք է սկսեն և նա չպետք է խոչընդոտի դրան: Ու հիմա՝ կանչում են «կարմիր գորգի» վրա: Չի բացառվում, որ նոր փաստաթղթեր էլ ստորագրվեն, և հնարավոր է, որ հանրությանը դրանք հայտնի էլ չդառնան, մնան գաղտնի:

Ի դեպ, առաջիկայում նախատեսված է Պուտին-Էրդողան հեռախոսազրույցը: Թեև պաշտոնապես այլ թեմաներ են նախանշվում, բայց պարզ է, որ Պուտինն ու Էրդողանը նաև Սոչիի բանակցությունների հիմքով կքննարկեն ստեղված իրավիճակը:
Թուրքիայի արտգործնախարար Մևլութ Չավուշօղլուի խոսքով՝ Պուտին-Էրդողան հեռախոսազրույցը կարող է տեղի ունենալ դեկտեմբերի 3-ին։

Այսինքն, Մհեր Գրիգորյանի գլխավորած պատվիրակությունը դեկտեմբերի 1-3-ը Մոսկվայում՝ Հայաստանի, Ադրբեջանի և Ռուսաստանի փոխվարչապետների համանախագահությամբ եռակողմ աշխատանքային խմբի բանակցություններին կմասնակցի, որի արդյունքներն էլ կքննարկեն արդեն Պուտինն ու Էրդողանը՝ հեռախոսազրույցի ընթացում:

Հիշեցնենք, որ երկու օր առաջ, Էրդողանն ու Ալիևը կարևորեցին «զանգեզուրյան միջանցքը», անգամ կոչ արեց երրորդ երկրներին ներդրումներ իրականացնել, այսպես ասած՝ մասնակցել տարածաշրջանային զարգացմանը:

Մետաքսյա Շալունց