Վրաստանում պատվաստվելու համար պետությունը քաղաքացուն փող է տալիս․ ի՞նչ են անելու Հայաստանում

Առողջապահության նախարար Անահիտ Ավանեսյանը հայտարարել է, որ Հայաստանում կորոնավիրուսի նոր՝ «oմիկրոն» շտամի դեպք այս պահի դրությամբ չի գրանցվել:

Վիրուսի շտամները նույնականացվում են ոչ թե ՊՇՌ թեստի միջոցով, այլ դրանց սեկվենավորման արդյունքում: Նախարարը վստահեցերել է, թե այդ կարգի աշխատանքները Հայաստանում ևս իրականացվում են:
«Եվ մենք այսօր էլ արդեն որոշակի նմուշներ ուղարկել ենք լաբորատորիա՝ նման հետազոտություններ անցկացնելու: Այդ հետազոտությունները պարբերական բնույթ են կրում: Այս պահին չունենք նման բան գրանցված»,- պնդել է Ավանեսյանը։ Նա նաև հավատացրել է, թե Հայաստանում «օմիկրոն» շտամի հայտնաբերման դեպքում, հանրությունն այնպայման կտեղեկանա այդ մասին:
Եթե կա նոր շտամ, ապա թերևս կարևոր է հասկանալ՝ առկա պատվաստանյութերը արդյունավե՞տ են նոր շտամի նկատմամբ։ Նախարարն ասում է, որ դեռ պետք է պարզվի հետազոտության արդյունքում:

Աշխարհում հարցականի տակ է առնվում կիրառվող պատվաստանյութերի օգտակարությունը․ մտահոգություններ կան, որ ներկայիս պատվաստանյութերը կարող են արդյունավետ չլինել օմիկրոնի դեմ: Այնուամենայնիվ, Առողջապահության համաշխարհային կազմակերպությունը գնահատել է օմիկրոնի դեմ պատվաստանյութերի արդյունավետությունը և եզրակացրել, որ գոյություն ունեցող դեղամիջոցները դեռևս արդյունավետ են վիրուսի այս շտամի դեմ, քանի որ դրանք նվազեցնում են մահացության ռիսկը:
Հայտնի ամերիկահայ գործարար Նուբար Աֆեյանի հիմնադրած Moderna պատվաստանյութի գլխավոր տնօրեն Ստեֆան Բանսելը հայտարարել է, որ կորոնավիրուսի «օմիկրոն» նոր տարբերակի դեմ պատվաստանյութ մշակելու եւ մատակարարելու համար ամիսներ կպահանջվեն։
Այնուամենայնիվ՝ պատվաստման գործընթացը աշխարհի ոչ մի երկրում չի դադարում, հակառակը՝ էլ ավելի է խրախուսվում։ Մեր հարևան Վրաստանում, օրինակ, պատվաստվելուց հետո սոցիալան հատոկ խմբերի քաղաքացիներին՝ թոշակառուներ, նպաստառուներ և այլն, պետությունը 200-ական լարի չափով աջակցություն է հատկացնում։ Հայաստանում նման պրակտիկա չի եղել ու չկա։

Կորոնավիրուսի «օմիկրոն» շտամը, ինչպես հայտնի է, տարածվել է Հարավաֆրիկյան Հանրապետությունից: Աշխարհում համաճարակի այս նոր տեսակով պայմանավորված նոր խստացումներ և սահմանափակումներ են սկսվել։
ՀՀ առողջապահության նախարարությունը, նոր շտամով պայմանավորված, նախատեսում է սահմանափակել Հարավաֆրիկյան Հանրապետությունից, Բոտսվանայի Հանրապետությունից, Լեսոտոյի Թագավորությունից, Նամիբիայի Հանրապետությունից, Զիմբաբվեի Հանրապետությունից, Մոզամբիկի Հանրապետությունից, Մադագասկարից և Տանզանիայից քաղաքացիների մուտքը Հայաստան :
Եվրոպական երկրները հայտարարել են թռիչքները դեպի աֆրիկյան երկրներ արգելելու մասին։ Բացի այդ՝ կերկարաձգի կարանտինը մի շարք երկրներից ժամանած ճանապարհորդների համար և կսահմանափակի մարդկանց թիվը հասարակական վայրերում։
Ճապոնիան ևս հայտարարել է, որ փակում է իր սահմանները՝ օտարերկրացիների մուտքն այդ երկիր կարգելվի։

Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադանոմ Գեբեյսուսը հայտաարրել է, որ կորոնավիրուսի օմիկրոն շտամի հայտնվելու պատճառով մարդկությունը բարդ իրավիճակում Է հայտնվել:Նա նաև ասել է, թե երկրները պետք է «համավարակների դեմ նոր համաձայնագրի» կնքեն։ ԱՀԿ-ի ղեկավարի խոսքով՝ «հարկավոր Է ոչ թե պատժել, այլ շնորհակալություն հայտնել Հարավային Աֆրիկային նոր տարբերակի հայտնաբերման, սեքվենացման և դրա մասին տեղեկացնելու համար»։
Նոր շտամը մեծ արագությամբ տարածվում է Եվրոպայում և համավարակի դեմ համաձայնագրի մասին կոչով հանդես է եկել Գերմանիայի կանցլեր Անգելա Մերկելը։

Աշխարհը խոսում է նաև նոր խստացումների մասին, որոնցից անմասն չի մնա նաև Հայաստանը։ 2022 թվականի հունվարի 1-ից հանրային սննդի վայրերում, ռեստորաններ, սրճարաններ, մշակութային հաստատություններ և այլն, քաղաքացիների մուտքը կթույլատրվի միայն ՊՇՌ թեստի բացասական արդյունքի կամ պատվաստման հավաստագրի առկայությամբ:

Հայկ Դավթյան