Թուրքիան մտադիր չէ միայնակ ցամաքային գործողություն սկսել Սիրիայում

ՄԱԿ-ում Թուրքիայի մշտական ներկայացուցիչ Հալիթ Չևիքը լրագրողներին ասել է, որ Թուրքիան իրավունք ունի պատասխան տալու Սիրիայի տարածքից արձակվող գնդակոծություններին, սակայն նաև նախազգուշացրել է, որ իր երկիրը մտադիր չէ միայնակ ցամաքային գործողություն սկսել այդ երկրում: Նրա խոսքով՝ թուրքական զորքի մուտքը Սիրիա հնարավոր է միայն ԱՄՆ գլխավորած միջազգային կոալիցիայի կազմում, որը պայքարում է «Իսլամական պետություն» ահաբեկչական խմբավորման դեմ, կամ էլ այն դեպքում, եթե դա արտոնի ՄԱԿ-ի Անվտանգության խորհուրդը հայտնում է ՏԱՍՍ գործակալությունը։ Անդրադառնալով Սիրիայում քուրդ զինյալների գործողություններին՝ Չևիքը նշել է, որ նրանք «կռվում են ոչ թե Ասադի ռեժիմի (Դամասկոսում- Խմբ.) կամ ԻՊ-ի դեմ»։ «Այն տարածքը, որը նրանք գրավել են, չեն վերցրել ԻՊ-ից կամ «Ջեբհաթ ան-Նուսրայից»։ Այն զավթվել է սիրիական չափավոր ընդդիմությունից»,- ասել է թուրք դիվանագետը։ Նա ընդգծել է որ Անկարան Սիրիայի աջակցության միջազգային խմբի անդամ է և «աջակցում է հարևան երկրում ճգնաժամի քաղաքական լուծմանը»։ Նրա խոսքով՝ այս փուլում գլխավոր նպատակը հրադադարի հասնելն ու ԻՊ-ի դեմ ադյունավետ պայքարելն է։