Անբարոյականի վերջին հանգրվանը. խոստովանական ցուցմունք դավաճանության մասին
Նիկոլ Փաշինյանը, որ «կրուտիտի» մեծ վարպետ է եւ ցանկացած իրավիճակ կարող է այնպես պտտել, որ ինքը միշտ ջրից չոր դուրս գա, հայտնվել է դժվարին իրավիճակում: Նախ, որ արդեն այնքան է ստել, այնքան է խճճվել իր հյուսած ստի սարդոստայնում, որ ամեն վայրկյան կարող է հակասել իր նախորդ խոսքին ու հայտնվել իր իսկ ստեղծած թակարում, երկրորդ՝ կան մարդիկ, որ տեղում իր երեսին են նետում իր ստերն ու «կրուտիտները»: Խորհրդարանում հարցուպատասխանի ժամանակ այդպիսի մի անհարմար իրավիճակում նրան դրեցին Պատիվ ունեմ խմբակցության պատգամավորներ Հայկ Մամիջանյանն ու Աննա Մկրտչյանը:
Մամիջանյանը հիշեցրեց երեկ ԱԺ-ում իշխանական պատգամավորների հնչեցված «մտքի գոհարները»՝ «անվտանգության բարձիկները իրենք պիտի ապացուցեն՝ բարձի՞կ են, թե՞ ծակած փուչիկ», «անհրաժշետության դեպքում նոր դաշնակից կգտնենք», «ժամանակն է եկել, որպեսզի տանք մեր դաշնակիցների գնահատականը»:
«Այս հակառուսական հիստերիան երեկ այս դահլիճում զեղում էին Ձեր թիմի անդամները: Ես ուզում էի հարցնել՝ սա Ձեր հրահա՞նգն է, թե՞ իրենց ինքնագործունեությունը՝ չնայած, բոլորս գիտենք, որ ձեր ֆրակցիայի մեծամասնությունը ելույթները ստանում է մեսենջերներով ու առանց ձեր համաձայնության ուր մնաց ելույթ ունենան Ռուսաստանի դեմ, նույնիսկ, արտաշնչելը միշտ չի, որ անում է», - դիմելով Նիկոլ Փաշինյանին՝ ասաց պատգամավորը:
Փաշինյանն էլ հայտարարեց՝ Հայաստանում հակառուսական հիստերիա, եթե նույնսիսկ, կա, դրա հեղինակը իշխանությունը չէ:
«Հայաստանի Ազգային ժողովի ամբիոնից հնչած մտքերը լրացուցիչ մեկնաբանության, առավել ևս, սուբյեկտիվ մեկնաբանության կարիք չունեն: Մենք ասել ենք՝ հայ-ռուսական ռազմավարական գործընկերությունը մեր անվտանգության համակարգի առանցքային գործոններից է ու ՀԱՊԿ-ը այն անվտանգության համակարգն է, որին մենք անդամակցում ենք», - ասաց նա:
Մամիջանյանը բերանին եկավ՝ ինչպես ստացվեց, որ Հայաստանը այդքան ուշ կամ ընդհանրապես, մինչև հիմա դիմե՞լ է ՀԱՊԿ-ին:
«Ռուսերեն իմացող չկա՞ր, թուղթ չունեի՞ք, ապա անցավ բուն հարցին՝ «Դուք մի քիչ առաջ ասացիք, որ չկրակելու հրաման տվողը դավաճան է, իսկ կես տարի առաջ էլի դուք ասել էիք՝ «դե հո Սև լճի 30 տոկոսի համար պատերազմ չէի սկսելու»: Ուրեմն՝ պետական դավաճանությունը պոզով-պոչով չի լինում, հենց այսպես է լինում ու լավ է, որ արդարադատության ձեր նախարարը նախաձեռնել է քրեակատարողական հիմնարկների վերանորոգում, որովհետև Ձեր ապագան հաստատ այնտեղ է անցնելու», - ասաց Մամիջանյանը:
Վարչապետ Նիկոլ Փաշինյանն ակնհայտ անակնկալի եկավ, կարկամեց ամբիոնի մոտ, հետո ասաց՝ վատ լուր ունի պատգամավորի համար. ինքը ՀՀ չորս քրեակատարողական հիմնարկում եղել է ու իրեն վատ չի զգացել :
«Սև լճի հետ կապված…», - մինչ կխոսեր Փաշինյանը, «Պատիվ ունեմ»-ը լքեց դահլիճը: «Մարդիկ կան, որոնց շատ հեշտ է ՔԿՀ-ներով վախեցնել, տեսաք, ՔԿՀ անունը տվեցի, ամբողջ խմբակցությունով փախան: Որևէ բառ, տերմին օգտագործելուց առաջ մտածեք՝ այդ բառը ձեզ նայելով ասեն՝ ձեզ հետ ինչ է կատարվելու, տեսանք՝ ինչ է կատարվում», - ասաց Փաշինյանը՝ ըստ էության խույս տալով իրեն ուղղված մեղադրանքներին: Սրանով էր թերեւս պայմանավորված, որ կոնկրետ հարց չտվեց նաեւ Աննա Մկրտչյանը: Պատգամավորը խնդրեց-հորդորեց Փաշինյանին պարզապես գնալ այն միջանցքի ուղղությամբ, որը տվել է թուրքին: Ասաց՝ Նիկոլ Փաշինյանը մեզ հասցրել է այն վիճակին, որ ՀՀ սահմաններին, մեր պետական դրոշից բացի, կարող եք գտնել ցանկացած պետության դրոշ: «Քիչ առաջ այս դահլիճում կրկին առաջնահերթությունների հստակեցում տեղի ունեցավ։ Փաստորեն խնդիրը ոչ թե մեր գերիներին ժամ առաջ վերադարձնելն է, այլ ուղղակի հետաքննելը՝ տեսնելու համար՝ ով ինչ պայմաններում է գերի ընկել։ Երբ մտածում եմ հարցնել, թե ինչու՞ և ինչպե՞ս է այս ամեն ինչն անում, հասկանում եմ, որ հերթական հայեցողական պատասխանն եմ լսելու»,- նշեց ընդդիմադիր պատգամավորը։
Ընդդիմադիր պատգամավորը պահանջ-խնդրանքով դիմեց Նիկոլ Փաշինյանին․ «Դրա համար երևի պահանջ՝ հանգիստ թողնելու Հայաստանի Հանրապետությունը և պահանջ՝ չկատարելու էն թշնամիների հանձնարարականները, որոնք ուզում են մասնատել ՀՀ-ն։ Երևի թե նաև պահանջ-խնդրանք՝ գնալ այն միջանցքի ուղղությամբ, որը խոստացել է տրվել ՀՀ-ի քաղաքացիների շահերի հաշվին», – հայտարարեց Աննա Մկրտչյանը։
Հենց այս լեզվով է պետք խոսել հայրենիքը թուրքին հանձնած, ցեղասպանության դուռ բացած անձնավորության հետ, նրան պետք չէ արտահայտվելու հնարավորություն տալ, քանզի ինչպես նշեցինք՝ «կրուտիտի» մեծ վարպետ է:
Անի Սահակյան
Հետևեք մեզ Viber-ում
