Լարված ու պայթունավտանգ իրավիճակ Վանաձորում

Արդեն մեկ շաբաթից ավելի է Վանաձոր քաղաքի Տարոն 4 թաղամասի 5 հազար հոգուց ավելի բնակիչներ հայտնվել են տեղական իշխանիկների քար անտարբերության կիզակետում: Ինչպես հայտնում է ֆոտոլրագրող Գագիկ Շամշյանը, մինչ Վանաձորի քաղաքապետ Մամիկոն Ասլանյանը իրեն պատեպատ է տալիս, որ ավագանու նիստեր տեղի չեն ունեում հայտնի պատճառներով, իրեն ընտրած Տարոն 4 թաղամասի բնակիչները գտնվում են «ջրադուլի» մեջ: Չգիտես ինչու Վանաձորի մեծն քաղաքապետին չի հետաքրքրում իր բնակչի մաքրության վիճակը: Բնակիչները զրկված են ջրից, իսկ պատկան մարմինները միայն մտածում են իրենց թափանները լցնելու մասին: Ֆոտոլրագրողի հետ զրույցում ջրին կարոտ բնակիչներն ասում էին. «Օրեր առաջ երբ վարչապետ Կարեն Կարապետյանը խորհրդակցություն անցկացնելու նպատակով ժամանել էր Լոռու մարզ, որոշել էինք ամբողջ բնակիչներով մեր ու մանուկ, ահել-ջահել ի նշա բողոքի Լոռու մարզպետարանի դիմաց դատարկ դույլերով ակցիա անեինք: Նույնիսկ պատրաստ էինք տանը կուտակված լվացքը բերեինք մարզպետարան: Իմանալով, որ այդպիսի բողոքի ակցիա ենք ուզում անենք, ափալ-թափալ ջրմուղից ու քաղաքապետարանից եկան թաղամաս ու ասացին, որ խնդիրը լուծվել է, մի քանի ժամից կանոնավոր ջուրը կստանաք: Մենք էլ մաքուր լոռեցու կերպարով հավատացինք նրանց: Սակայն վարչապետը գնաց, իսկ մեր ջրի պռունկին հայտնված 7-գլխանի հրեշը մնաց: Թե ով է էդ 7-գլխանի հրեշը՝ չգիտենք: Դրան միայն կկարողանա գլխատի մի ասլան ու կտրիճ մարդ: Իսկ մեր քաղաքապետարանում նման ասլան մարդ չկա՝ ինչքան էլ որոշ մարդկանց ազգանունը Ասլանյան լինի: Հուսով ենք, որ Լոռու մարզպետ Արթուր Նալբանդյանը իր հսկողության տակ կվերցնի այս խնդիրը, ու ամառվա այս տապին ինքը կդառնա էն ասլան տղեն, ով կգլխատի 7- գլխանի հրեշին»: Լուսանկարները՝ Արմինե Դանիելյանի: