Իշխան Զաքարյանին այս անգամ ոչինչ չի փրկի
Պատիվ ունեմ խմբակցությունից Իշխան Զաքարյանի դուրս գալու թեման ստվերվեց մի շարք այլ իրադարձությունների ֆոնին, սակայն պետք է նկատել, որ դա ոչ պակաս եւ ոչ այնքան կարեւոր հարց է, քան կարելի է կարծել: Այդ կարեւորությունն ամենեւին էլ չի դրսեւորվում Իշխան Զաքարյանի անձով, այլ խնդիրն այն է, որ իշխանությունը ի դեմս ճամբարափոխ պատգամավորի խորհրդարանում ունի սահմանադրական մեծամասնություն: Թեպետ Իշխան Զաքարյանը լրագրողների հարցին պատասխանելով վստահեցրել է, որ շարունակելու է գործունեությունն ընդդիմադիր դաշտում, իր խոսքով՝ ընդդիմադիր պատգամավոր է լինելու, բայց սա զավեշտալի բացատրություն է նաեւ այն առումով, որ Զաքարյանի խմբակցությունից դուրս գալը զուգորդվեց մամուլի հրապարակումներով, թե ընդդիմադիր պատգամավորի վրա վերջին ժամանակներն ինտենսիվ ճնշումներ են եղել, ինչով պայմանավորված է նրա քայլը: Մամուլում գրվեց նաեւ, որ Զաքարյանի դուրս գալը պայմանավորված է Միութենական պետության ձեւավորմամբ, նա ըստ մամուլի՝ որոշել է իր մոսկովյան կապերով աջակցել այս միությանը: Այստեղ էլ հարց է ծագում՝ ինչն էր իրեն խանգարում խմբակցության կազմում այդ ամենն աներ: Սա եւս ծիծաղելի փաստարկ է, որովհետեւ խորհրդարանական ընդդիմությունը այդ միության ձեւավորման առաջամարտիկներից է ու այդ մասին չեն էլ թաքցնում:
Մեզ հայտնի է դարձել, որ Իշխան Զաքարյանը, որ Արթուր Վանեցյանի հետ է իսկզբանե համագործակցել, դեմ է եղել Սերժ Սարգսյանի եւ Հանրապետականի հետ դաշինքին: Զաքարյանը հիմնավոր պատճառներ ունի դրա համար, Վերահսկիչ պալատի նախագահի պաշտոնում հիշեցնենք, թե ինչ կշտամբանքների արժանացավ Սերժ Սարգսյանի կողմից, երբ հայտարարեց, որ բյուջեի 70 տոկոսը մսխվում է: Հիմա լուրեր է տարածում, թե դրա համար է լքում Վանեցյանին:
Հայտնի է դարձել նաեւ, թե ինչպես է Արթուր Վանեցյանին վստահությանն արժանացել: Նա հաստափոր թղթապանակով ներկայացել է Վանեցյանին, վստահեցրել, որ ԲՀԿ-ի կառույցները բոլորն իրեն են ենթարկվում, որ բոլոր ընտրություններն ինքն է ԲՀԿ-ի համար կազմակերպել, հազարավոր ձայներ կարող է բերել, փոխըմբռնման արդյունքում ընկերություն է հաստատվել, Զաքարյանը գումարներ է տնօրինել այդ աշխատանքներն իրականացնելու համար եւ այդ ընթացքում բացարձակապես խոսակցություն չի գնացել մանդատ ստանալու, պատգամավոր դառնալու մասին: Վերջին օրերին ուլտիմատում է դրել՝ կամ կդառնամ պատգամավոր, կամ կխափանվի նախապես գծած սցենարը, որով պետք է ձայներ ստանան:
Նշենք, որ Զաքարյանի խմբակցությունից դուրս գալու հարցում մեծ դերակատարում է ունեցել ՔՊ-ական պատգամավոր Խաչատուր Սուքիասյանը. լրատվամիջոցները հաճախ են ֆիքսում զույգի սրճարանային հանդիպումները, եւ հիմա Զաքարյանն ինչ արդարացումներ ու հիմնավորումներ էլ փորձի ներկայացնել` պարզ է, որ իշխանության մատն է խառը: Պարզ է, որ տեղի է ունեցել դասական ճամբարափոխություն, ինչպես մեկ տարի առաջ այդ խմբակցության պատգամավորնեից Թագուհի Թովմասյանը Փաշինյանի թիմից սահուն անցում կատարեց Վանեցյանի ճամբար:
Այդուհանդերձ, սա այն դեպքն է, որ Զաքարյանի հոտառությունն իրեն դավաճանելու է, միգուցե ողջ կյանքում նա հաջողացրել է ճիշտ պահին, ճիշտ տեղում հայտնվել՝ մեկ Քոչարյանի, մեկ Սերժ Սարգսյանի, մեկ Գագիկ Ծառուկյանի կողքին ապահով կարիերա իրականացնել, սակայն Զաքարյանը պետք է հասկանա, որ այսօրվա իշխանությունները նախորդներից եւ ոչ մեկին նման չեն, որ ինքը գործ ունի երկիրը հանձնած, ցեղասպանության դուռ բացած,10 հազարի մահվան մեղքը ճակատներին գամած իշխանությունների հետ: Զաքարյանը մշտապես պարծենում է, որ Մանվել Գրիգորյանի հետ ԵԿՄ-ով ահռելի ներդրում է ունեցել Արցախում, հիմա այս ամենը փոշիանալու է, քանզի Զաքարյանն իշխանության կողքին կանգնելով տեր է կանգնում այն ավերին, որն արվել է: Իսկ եթե Զաքարյանն իրապես խոշոր ինքնախաբեությամբ է զբաղված, խորհուրդ կտանք մի պահ լսի իր հին բարեկամ Ռոբերտ Քոչարյանին ու հասկանա իշխանությունների աղետաբերության չափը:
Հետեւաբար իր բերած արդարացումներն էժանագին սիմֆոնիաներ ու լոլոներ են , քանի որ փաստն այն է, որ այս մարդն ինքնակամ գնում է համալրելու դավաճանների ոհմակը:
Անի Սահակյան
Հետևեք մեզ Viber-ում
