Ո՞վ է Արցախը դուրս թողել բանակցությունների սեղանից. Վիկտոր Սողոմոնյանի պարզաբանումը

«Ծառուկյան» դաշինքի պատգամավոր Արարատ Զուրաբյանն օրերս խորհրդարանում հայտարարելով, որ Արցախը բանակցությունների սեղանից դուրս է եկել իշխող Հանրապետականի օրոք, հարց է հնչեցրել՝ արդյո՞ք այսօր ջանքեր գործադրվում են Արցախը բանակցությունների սեղանին վերադարձնելու ուղղությամբ։ Ազգային ժողովի արտաքին հարաբերությունների մշտական հանձնաժողովի նախագահ Արմեն Աշոտյանը հարցին ի պատասխան նշել է. «ՀՀԿ-ն ուղղակի պատասխանատու է բանակցությունների համար 2008 թվականից: Կարծում եմ՝ որպես հարցի գիտակ, մենք իրար շատ լավ հասկացանք»։ Աշոտյանը թեպետ անուններ չի նշել, բայց ըստ էության, ակնարկել է Հայաստանի երկրորդ նախագահ Ռոբերտ Քոչարյանի նախագահության շրջանը։ 1in.am -ը ՀՀ երկրորդ նախագահ Ռոբերտ Քոչարյանի գրասենյակի պատասխանատու Վիկտոր Սողոմոնյանից հարցի շուրջ մեկնաբանություն խնդրեց. «Կոնկրետ այդ դիպվածը չեմ ուզում մեկնաբանել։ Բացարձակապես մեկնաբանելու կարիք չեմ տեսնում»,- ընդգծեց Սողոմոնյանը։ Հարցի շուրջ, Վիկտոր Սողոմոնյանը, այդուհանդերձ, հայտնեց հետևյալը. «Ինքս բազմիցս այդ մասին փաստաթղթեր եմ հրապարակել։ Այսինքն՝ ոչ միայն հայտարարություններ եմ արել, այլև կոնկրետ փաստաթղթեր եմ հրապարակել։ Այդ փաստաթղթերում հստակ երևում է՝ մինչև 1998 թվականը Ղարաբաղն արդեն դուրս էր մնացել բանակցային գործընթացից, այսինքն՝ եռակողմ բանակցություններ չէին ընթանում։ Ձեզ հիշեցնեմ՝ կա համապատասխան հայտարարություն, որ արել է Ժիրայր Լիպարիտյանը, ( խմբ. Մ. Գ. 1994–1997 թվականը ՀՀ նախագահի գլխավոր խորհրդական, հատուկ հանձնարարությունների գծով դեսպանն է եղել) դեռևս 1996 կամ 1997 թվականին՝ առ այն, որ «մենք սխալվել ենք, որ թույլ ենք տվել՝ բանակցություններն ընթանան առանց Ղարաբաղի» և այդ մասին իր հայտարարության մեջ բացատրություններ է տալիս։ Ինքս իմ հայտարարություններով այդ մասին բազմիցս նշել եմ և նորից դրան անդրադառնալ չեմ ուզում»,- եզրափակեց Վիկտոր Սողոմոնյանը։