Սամվել Բաբայանի «կինդերսյուրպրիզությունը», հաճույք ստանալ՝ կույս մնալով

Սամվել Բաբայանի ղեկավարած «Ազատական» կուսակցությունը հանդես է եկել հայտարարությամբ, որտեղ մասնավորապես ասվում է․ «Զանգվածային լրատվամիջոցներում հրապարակված՝ «Ազատական» կուսակցության Մեղրիի ավագանու թեկնածուների ցուցակի ձևավորման ժամանակ ՀՀ օրենսդրության պահանջների խախտման և այլ քաղաքական ուժի հետ համագործակցության հուշագրի ստորագրման, նյութերի վերաբերյալ, «Ազատական» կուսակցությունը պաշտոնապես հայտարարում է, որ «Ազատական» կուսակցությունը Մեղրի համայնքի ավագանու ընտրությունների արդյունքում որևէ քաղաքական ուժի հետ համագործակցության հուշագիր չի ստորագրել և որևէ անձի՝ կուսակցության անունից հանդես գալու լիազորությամբ չի օժտել։ Ինչ վերաբերվում է հիշյալ գործընթացներում ՀՀ ընտրական օրենսգրքի սահմանադրական օրենքի դրույթների խախտմանը, ապա կուսակցության համապատասխան ստորաբաժանման կողմից նախաձեռնվել է ստուգման գործընթաց, որի արդյունքները կներկայացվեն ՀՀ իրավապահ մարմիններին, նաև Կենտրոնական ընտրական հանձնաժողովին՝ օրենքով նախատեսված իրավական հետևանքներ առաջացնելու նպատակով»։

Հիշեցնենք, որ հոկտեմբերի 17-ին Մեղրիում ՏԻՄ ընտրություններ էին, որոնց արդյունքներով մասնակից որեւէ ուժ չի հաղթահարել 50 տոկոսը եւ համայնքի կառավարումը պետք է տեղի ունենա կոալիցիոն սկզբունքով: Ինչպես արդեն տեղեկացրել ենք ՔՊ-ն Մեղրիում երկրորդ տեղն է, առաջին տեղը Նիկոլ Փաշինյանի դուստր ձեռնարկության՝ Արամ Սարգսյանի կուսակցությունով առաջադրված թեկնածուն է: Անցողիկ շեմը հաղթահարել են եւս երկու ուժ՝ Սամվել Բաբայանի գլխավորած Ազատական կուսակցությունը եւ Ապրելու երկիրը, որի ոչ բացահայտ մեկենասը գործարար Ռուբեն Վարդանյանն է: Օրերս կոալիցիոն հուշագիր ստորագրվեց Արամ Սարգսյանի եւ Սամվել Բաբայանի թիմակիցների միջեւ, հայաստանում հիմք դրեցին քաղաքապետի պաշտոնի առաջին «օրթախ» կառավարման նախադեպը, ըստ հուշագրի 2.5 տարին Զավենիչի թեկնածուն կկառավարիք համայնքը, հաջորդ 2.5 տարին՝ Բաբայանի թեկնածուն։ Հուշագրից մի քանի օր անց Սամվել Բաբայանն է սովորույթի համաձայն «կինդերսյուրպրիզություն» անում։ Նա տարածել է անորոշ մի հայտարարություն, որից միակ բանը որ հասկացվում է այն է, թե իր կուսակցությունը կապ չունի ստորագրված հուշագրի հետ, որ ստորագրողները իբր իր կուսակիցները չեն։

Սամվել Բաբայանը, հիրավի, անփոխարինելի մանիպուլատոր է, իհարկե, Նիկոլ Փաշինյանից հետո, բայց տեղի ունեցածը մանիպուլացնել հնարավոր չէ։ Այո, ՏԻՄ օրենքը թույլ է տալիս համայնքային ընտրացուցակի 30 տոկոսը ոչ կուսակցականներ ընդգրկել, բայց դա չի նշանակում, որ կուսակցության էությունն ու բովանդակությունը դրանից փոխվում են։ Տվյալ կուսակցությունն է որոշում ում ընդգրկել իր ցուցակում, ում որ համարը հատկացնել, ապա մասնակցել ընտրությունների։ Եթե Բաբայանը որոշել է, որ առաջին հորիզոնականներում ապակուսակցականների գրել, դա մեղմ ասած իր խնդիրն է, բայց փաստն այն է, որ այդ մարդիկ առաջադրվել են իր հիմնադրած կուսակցությամբ։ Ուստի պետք չէ կույս մնալ եւ հաճույք ստանալ եւ ժողովրդին էլ ցույց տալ, թե իբր Նիկոլ Փաշինյանի դաշնակիցները չեն։

Անի Սահակյան