Ջայլամ դառնալու ժամանակը

Մինչև 2018 թվականը ԵՊՀ հոգաբարձուների խորհրդի նախագահը ՀՀԿ նախագահ, Հայաստանի երրորդ նախագահ Սերժ Սարգսյանն էր:

Այս փաստը տարիներ շարունակ խստորեն քննադատվում էր այն ժամանակվա ընդդիմության ներկայացուցիչների կողմից, որոնցից շատերն այսօր իշխանության կարկառուն դեմքերից են։ Բուհերի կուսակցականացման դեմ երբեմնի մոլի պայքար մղողները նոյեմբերի 6-ին ԵՊՀ հոգաբարձուների խորհուրդի նախագահ են ընտրել ՔՊ կուսակցության վարչության նախագահ, ՀՀ փոխվարչապետ Սուրեն Պապիկյանին:

Հասկանալի է, որ ԵՊՀ-ն վերահսկելու գործը առանց Նիկոլ Փաշինյանի անմիջական հրահանգի որևէ ՔՊ-ականի չէր կարող վստահվել։ Պապիկյանին այս պաշտոնում նշանակել է հենց Փաշինյանը՝ սա փաստ է, հակառակ պարագայում որևէ տրամաբանական բացատրություն չկա ու չի կարող լինել այս անհեթեթ ընտրության մեջ։
Այսպիսով՝ որպես փաստ արձանագրենք, որ ԵՊՀ-ն այսօր ավելի շատ է քաղաքականացված և կուսակցականացված, քան նախկինում էր, որովհետև ԵՊՀ ռեկտորի պաշտոնակատար Հովհաննես Հովհաննիսյանը նույպես ՔՊ-ական է․ նա մինչև ռեկտորի պաշտոնակատար դառնալը ՔՊ խմբակցության պատգամավոր էր, ԱԺ մշտական հանձնաժողովի փոխնախագահ։

Այսինքն՝ հեղափոխական իշխանությունները, Նիկոլ Փաշինյանի անմիջական գլխավորությամբ, իրենց ջայլամի տեղ են դրել։ Նրանք այժմ հերթով իրականացնում են այն բոլոր արատավոր քայլերը, որոնց դեմ պայքարը դրոշակ դարձրած երեքուկես տարի առաջ եկան իշխանության։ Քայլող իշխանականները պայքարում էին բուհերի քաղաքականացման և կուսակացկամանցամն դեմ, այսօր իրենց կուսակցության նախագահին կարգում են մայր բուհի կառավարման խորհրդի նախագահ։
Այս մարդիկ տարիներ շարունակ ամենասուր ձևով քննադատում էին նախկիններին՝ աշխատասենյակներում Սերժ Սարգսյնաի լուսանկարը փակցնելու համար, և իշխանության եկան Սարգսյանի նկարը լուսամուտից ցած նետելու հայտնի ակցիայով։

Այսօր ՔՊ-ական կառավարության նախարարների՝ բոլորի անխտիր, կաբինետներում փակցված է Նիկոլ Փաշինյանի լուսնակարը։ Կրթության, գիտության, մշակույթի և սպորտի նախկին սուպերնախարար Արայիկ Հարությունյանի տված բացատրության համաձայն՝ սա միանգամայն նորմալ և ընդունելի վիճակ է, քանի որ Նիկոլ Փաշինյանը ընտրված ղեկավար է՝ ի տարբերություն Սերժ Սարգսյանի, որը, նրա պատկերացմամբ, ընտրված չէր։ Ավելորդ է ասել, որ նախկին ՀՀԿ-ական նախարարների համար Սերժ Սարգսյանը շատ էլ լավ ընտրված ղեկավար էր, ասել է թե՝ նրանք միանգամայն իրավացիորեն հիմքեր ունեին իրենց առաջնորդի նկարը կախել գլխավերևում։

Նույն ձևով խորհրդարանական սահմանադրության մասին ամենավերջին քննադատական խոսքերն ասող Նիկոլ Փաշինյանն արդեն ավելի քան երեք տարի ըմբոշխնում է սուպերվարչապետության հմայքը՝ հավանաբար մտովի օրհնելով այդ սահմանադրությունը գրողներին, առանց որի ինքն անգամ երազում վարչապետ դառնալ չէր կարողանա։ Այնպես որ՝ ջայլամ բուծեք, հեղափոխակա՛ն քայլիստներ, դուք ո՛չ սկզբունք ունեք, ո՛չ էլ գաղափար։ Ձեր երազանքը աթոռն ու իշխանությունը մինչև վերջ, ոլորտ առ ոլորտ ստանալն էր։

Նաիրա Բաղդասարյան