Լոբբինգը չաշխատեց
«Փաստ» օրաթերթը գրում է. «Դեկտեմբերի 5-ին կայանալիք ընտրությունները բավականին մրցակցային են լինելու Կոտայքի մարզի Նաիրի համայնքում: Այստեղ մրցելու է վեց քաղաքական ուժ, այդ թվում՝ իշխող «Քաղաքացիական պայմանագիր» կուսակցությունը: ՔՊ-ի համամասնական ցուցակի առաջին համարը Վաղարշակ Ամիրխանյանն է, որը ՔՊԿ Նաիրիի տարածքային խորհրդի նախագահն է ու Բնապահպանության և ընդերքի տեսչական մարմնի ղեկավարի տեղակալը: Սակայն, «Փաստ» թերթի տեղեկություններով, այս թեկնածության առաջադրումն այնքան էլ հարթ չի անցել: Ամիրխանյանի թեկնածությանը դեմ է եղել Եղվարդի քաղաքապետ Նորայր Սարգսյանը:
Վերջինս նախկին հանրապետական է, իսկ 2018թ. իշխանափոխությունից հետո ներդաշնակ աշխատել է Փաշինյանի իշխանության հետ: Մեր աղբյուրների փոխանցմամբ, Սարգսյանը փորձել է ՔՊ-ում լոբբինգ իրականացնել այլ թեկնածուի օգտին, և նույնիսկ մի պահ կուսակցությունում իսկապես ոչ թե Ամիրխանյանին, այլ ուրիշ թեկնածուի առաջադրելու տրամադրվածություն է եղել: Մեր հավաստի տեղեկություններով, այստեղ գործին միջամտել է ՇՄ նախարար Ռոմանոս Պետրոսյանը: Ի դեպ, Վաղարշակ Ամիրխանյանը համարվում է վերջինիս «մարդը»: Արդյունքում թե՛ Նաիրիի տարածքային կազմակերպությունում, թե՛ ՔՊ «վերնախավում» որոշել են առաջադրել հենց Ամիրխանյանին»:
Առավել մանրամասն՝ թերթի այսօրվա համարում
Հետևեք մեզ Viber-ում
