Գյուլը ցավում է. հայ-թուրքական արձանագրությունները արդյունք չտվեցին

ԱՊԱ-ին տված հարցազրույցում Թուրքիայի նախկին նախագահ Աբդուլլահ Գյուլը, անդրադառնալով իր նախագահության օրոք ստորագրված հայ-թուրքական արձանագրությունները, հայտարարել է, որ ինքը հավատում էր խնդրի կարգավորմանը ոչ թե պատերազմի միջոցով, այլ քաղաքականության ու դիվանագիտության: «Ես աշխատում էի հանուն դրա, բայց ապարդյուն: Անկասկած, մենք երբեք չենք հաշտվի Ադրբեջանի տարածքների մի մասի օկուպացիայի հետ: Մենք մի ազգ ենք՝ երկու տարբեր պետություն: Այդ օկուպացիան երկար ժամանակ է արդեն տևում: Կա խնդրի կարգավորման երկու ճանապարհ՝ կա՛մ պատերազմ, կա՛մ խաղաղություն ու դիվանագիտություն: Իհարկե, դիվանագիտական ճանապարհով խնդրի լուծման համար հարկ է բանակցել, դրանք երբեմն լինում են բաց՝ ԵԱՀԿ Մինսկի խմբի շրջանակում անցկացվում են նիստեր, երբ Հայաստանի և Ադրբեջանի նախագահները հնարավոր է հանդիպեն: Իսկ երբեմն այդ հանդիպումներն անցնում են փակ դռների ետևում՝ դիվանագետները նստում են սեղանի շուրջ, քննարկում, թե ինչպես կարող են լուծել այս խնդիրը և խնդրում աշխարհին աջակցել իրենց: Ցավոք, մեծ պետությունները տարիներ շարունակ այս հիմնախնդրին համարժեք ուշադրություն չեն հատկացրել», - նշել է Գյուլը: