Կարեն Անդրեասյան, կարող է ծվծվա՞ս

Իշխող Քաղաքացիական պայմանագիր կուսակցության՝ ՄԻՊ-ի դեմ իրականացվող տեւական արշավը նոր մասշտաբների է հասնում: ՄԻՊ-ը հայտնվել է անգամ ԱԽՔ-ի թիրախում, ԱԽ քարտուղար Արմեն Գրիգորյանը վերջերս հայտարարեց՝ ՄԻՊ-ի հայտարարությունները քաղաքական բնույթի են, և նրանք առաջադրելու են ՄԻՊ-ի իրենց թեկնածուին: Հիշեցնենք, որ տեւական ժամանակ է Նիկոլ Փաշինյանի թղտվությամբ ՔՊ-ականները քողարկված եւ բացահայտ արշավ են սկսել ՄԻՊ Արման Թաթոյանի դեմ, որ Հայաստանում թերեւս բացառիկ պաշտոնյան է, որն անխոնջ իր գործն է անում եւ իր բարձր պրոֆեսիոնալիզմով ու արդյունավետ գործունեությամբ էլ ավելի ցցուն է դարձնում պարազիտ իշխանության անգործությունը: Հիշենք ՄԻՊ-ի դեմ ֆեյսբուքյան ստատուսները, ապա խորհրդարանում բացահայտ անհարգալից պահվածքը ՔՊ-ական մի շարք պատգամավորների կողմից: Հիմա, երբ լուրեր կան, որ Արման Թաթոյանը հնարավոր է քաղաքական ասպարեզ մտնի, իշխանության սրտի դողն ավելի է մեծացել, ասպարեզ են հանում ծանր հրետանիներին: Երեկ իր ասուլիսում անդրադառնալով Արմեն Գրիգորյանի հայտարարությանը Թաթոյանն ասել է. «Այդ պաշտոնատար անձը գերազանցել է իր լիազորությունները։ Ո՞վ է նրան իրավունք տվել մարդու իրավունքների պաշտպանի փոփոխության հարց քննարկել»: Արման Թաթոյանը նկատեց՝ դա բացահայտ ոտնձգություն է ՄԻՊ անկախ հաստատության նկատմամբ, այն էլ գործադիր իշխանության բարձրադիր պաշտոնատար անձի կողմից։
«Քանի որ Հայաստանում կա մարմին, որը հանրային ծառայողի վարքագծի կանոնների խախտումների համար հարուցում է վարույթներ, պաշտոնապես դիմել եմ Կոռուպցիայի կանխարգելման հանձնաժողով։ Այդ մարդն իր հայտարարությունների համար պետք է պատասխանատվության ենթարկվի, որ ապահովվի Հայաստանի ՄԻՊ-ի անխափան, անկաշկանդ ու անկախ աշխատանքը հետագայում»,-ասել է Արման Թաթոյանը։
Մարդու իրավունքների պաշտպանը նաև նշել է, որ այդ պաշտոնյան այն անձը չէ, որ ժամանակ հատկացներ ու մանրամասն անդրադառնար նրա հայտարարությանը, բայց քանի որ հետևողական աշխատանք է տարվում վարկաբեկելու ՄԻՊ-ի աշխատանքը, Արման Թաթոյանն անդրադարձավ մի քանի հարցի։
«Ի՞նչ է ասում այդ պաշտոնատար անձը, որ ես ընդհանրապես անաչառ չեմ, և քաղաքական հայտարարություններ եմ անում։ Ծիծաղելի է, որովհետև դրանից մեկ կամ երկու օր առաջ Վենետիկի հանձնաժողովն ասում է, որ ՄԻՊ-ն առանցքային դերակատար է երկրում՝ մարդու իրավունքների ժողովրդավարության զարգացման համար»,-նշեց մարդու իրավունքների պաշտպանը։
Վերջինս հիշեցրեց՝ դեռ 2018թ.-ին՝ հեղափոխության ամիսներին, անձամբ կապի մեջ էր այսօրվա բարձրաստիճան պաշտոնյաների հետո։ Նրանք նամակագրությամբ Արման Թաթոյանին էին ուղարկում բերման ենթարկվածների անուն-ազգանուններ, որ այցելեին նրանց. «Այդ ժամանակ ես անաչառ է՞ի, հիմա դադարել ե՞մ անաչառ լինել։ Երբ Արմեն Գրիգորյանին ձերբակալել էին, գիշերվա 3-ին այցելեցի այնտեղ։ Նշանակում է՝ այդ ժամանակ անաչառ էի, բայց հիմա երբ պաշտոնյա են դարձել, հիմա անաչառ չե՞մ»,-ասաց Արման Թաթոյանը։
Նկատենք, որ Թաթոյանի դեմ իշխանությունների նման անհանդուրժողականությունը հիշեցնում է Կարեն Անդրեասյանի-ՀՀԿ փոխհրաձգությունների ժամանակները, երբ ՄԻՊ պաշտոնում Անդրեսայանը իշխող ՀՀԿ-ի կողմից եւս ենթարկվում էր հալածանքների ու կտտանքների, որոնք ի վերջո իրենց արդյունքը տվեցին: Ի դեպ այդ ժամանակ միայն Նիկոլ Փաշինյանն ու իր կուսակցությոնը հրապարակային աջակցություն հայտնեցին ՄԻՊ-ին, հիմա Կարեն Անդրեասյան կարող է ծվծվա՞ս, հիմա ինչու ձայնդ դուրս չի գալիս, իսկ տարիներ առաջ գոռգոռում էիր, Նիկոլն էլ ձայնակցում էր քեզ:

Անի Սահակյան