Մեկն էլ լինի՝ նրան բացահայտի

 Հակակոռուպցիոն կոմիտեն նախատեսում է 2022-ին քննել մոտ 2 000 կոռուպցիոն բնույթի հանցագործություններ: Կոմիտեն ամբողջությամբ ձևավորվել է ընդամենը 2021-ի հոկտեմբերի 23-ին: Այդ պատճառով կազմակերպության 2022-ի բյուջեն դեռևս գտնվում է մշակման փուլում, առկա է դրա նախնական տարբերակը:

Կոմիտեն իրականացնելու է «Կոռուպցիոն հանցագործությունների բացահայտում և քննության ապահովում» բյուջետային ծրագիրը, որի իրականացման համար նախատեսվում է 2 մլրդ 378 մլն 900 հազար դրամ բյուջետային հատկացում: Հակակակոռուպցիոն կոմիտեի նախագահ Սասուն Խաչատրյանը ԱԺ մշտական հանձնաժողովների բյուջետային քննարկումների ժամանակ հայտարարել է, որ իրենց գործունեության վերաբերյալ այլ արդյունքային ցուցանիշներ ներկայացնել հնարավոր չէ։

«Ծրագրի գծով վերջնական արդյունքի չափորոշիչը ենթադրյալ հանցագործությունների դեպքերով քննված քրեական գործերն են: Թվային ցուցանիշ հնարավոր չէ կանխատեսել: Բայց 2022-ին նախատեսում ենք քննել մոտ 2 000 կոռուպցիոն բնույթի հանցագործություններ, քանի որ վիճակագրական ցուցանիշները մոտավորապես այդ թվի մասին են խոսում: Հատուկ քննչական ծառայությունը, Քննչական կոմիտեն, ԱԱԾ քննչական դեպարտամենտը և ՊԵԿ քննչական ծառայությունը քննել են մոտ այդ քանակի քրեական գործեր»,- բացատրել է Սասուն Խաչատրյանը:

Նա նաև տեղեկացրել է, որ ինքն ու իր ղեկավարած հիմնարկի աշխատակիցները ծանրաբեռնվելու են ոչ միայն քրեական գործերով, այլ նաև կոռուպցիոն բնույթի դիմումների, բողոքների քննությամբ, նյութերի նախապատրաստմամբ, օպերատիվ հետախուզական միջոցառումների իրականացմամբ: Նախատեսվում է հաջորդ տարի գործարկել նաև Կոմիտեի տարածքային ստորաբաժանումները: «Կոռուպցիոն հանցագործությունների բացահայտում և քննության ապահովում» բյուջետային ծրագիրը, որի իրականացումը հակակոռուպցիոն կոմիտեի հիմնական գործն է, բաղկացած է երեք միջոցառումից: «Քրեական վարույթի իրականացում» միջոցառման անցկացման համար կտրամադրվի 2 մլրդ 336 մլն դրամ: «Վերապատրաստման և հատուկ ուսուցման կազմակերպում» միջոցառման իրականացման համար ծախսվելու է 12,6 մլն դրամ։ Այդ գումարով կվերապատրաստվի կոմիտեի 96 ծառայող։ Երրորդ միջոցառումը Հակակոռուպցիոն կոմիտեի պահուստային ֆոնդն է. այն կկազմի 30,3 մլն դրամ:

Այս տարվա սեպտեմբերին, երբ ստեղծվեց Հակակոռուպցիոն կոմիտեն, հայտարարվեց, որ նոր մարմնի իրավասությանն են անցնելու Հայաստանում կոռուպցիոն գործերի քննությունները, որոնք նախկինում իրականացնում էին մի քանի իրավապահ մարմիններ՝ ԱԱԾ-ն, ՀՔԾ-ն, Քննչական կոմիտեն և Պետեկամուտների կոմիտեն։ Հակակոռուպցիոն կոմիտեի ձևավորումից հետո լուծարվեց 2007թ. ստեղծված Հատուկ քննչական ծառայությունը։ Նախկինների թալանածը հետ բերելու խրոխտ լոզունգով իշխանության եկած Նիկոլ Փաշինյանը առ այսօր թալանի բացահայտման գոնե մեկ կոնկրետ օրինակ չի ներկայացրել հանրությանը։ Ի դեպ, հենց Սասուն Խաչատրյանն էր խոստացել արմատախիլ անել կոռուպցիան և վերադարձնել ժողովրդից թալանված միլիարդները, օրենքի դաշտ կանչել մարդասպաններին և այդ մարդասպանների հովանավորներին։

Ավելի քան երեք տարի սրանք եղել են սոսկ պոպուլիստական բառեր։ Առայժմ բոլոր կոռուպցիոն գործերն ուղեկցվել են բռնել-ազատ արձակելու տեսարաններով։ Փաստորեն, Նիկոլ Փաշինյանի՝ կոռուպցիոներներին դատելու հույսը շարունակում է մնալ Սասուն Խաչատրյանը։ Ի դեպ, Խաչատրյանը այդպես էլ չկարողացավ բացահայտել, թե ով էր հրապարակել իր և ԱԱԾ նախկին պետ Արթուր Վանեցյանի, ինչպես նաև Վանեցյանի և Նիկոլ Փաշինյանի սկանդալային ձայնագրությունները։

Հայկ Դավթյան