Սամվել Ալեքսանյանը եւս մեկ խոշոր մոլ կբացի. armtimes.com

ԱԺ «Հանրապետական» խմբակցության պատգամավոր, գործարար Սամվել Ալեքսանյանը հաջորդ տարի եւս մեկ մոլ կբացի Երեւան քաղաքում: Armtimes.com-ին հասած տեղեկությունների համաձայն, Երեւան քաղաքի Աջափնյակ վարչական շրջանի «սերվիսի խաչմերուկ» կոչվող տարածքում կառուցվող առեւտրի կենտրոնը պատկանում է հենց Սամվել Ալեքսանյանին՝ չնայած այն բանին, որ տարածքում շինաշխատանքներ կատարողներին սեփականատերերի այլ անուններ է ասվում: Այս մոլն ունի առանձնահատկություն, այն տարբերվելու է Երեւանում հայտնի առեւտրի կենտրոններից իր մասնագիտացված լինելու հանգամանքով: «Գարաժ մաստեր մոլլ»-ը նախատեսված է ավտոմեքենաների պահեստամասերի, աքսեսուարների եւ նմանատիպ այլ պարագաների վաճառքի համար: Ծրագրված է նաեւ, որ տարածքում լինելու են ավտոմեքենաների սպասարկման կետեր: Մազմանյան եւ Շիրազի փողոցների հատման մասում գտնվող «Գարաժ մոլ»-ի շինարարությունը գրեթե ավարտված է, այժմ ներքին հարդարման աշխատանքներ են կատարվում:Նշենք, որ ավտոմեքենաների պահեստամասերի վաճառքի ամենահայտնի կետերը տեղակայված են Երեւանի «տեցի կրուգ» կոչվող տարածքում: Շատերը գիտեն, որ այդ վայրում կարելի է գտնել ամեն մանրունք, որը կապված է ավտոմեքենայի հետ: Քանի որ «տեցում» բազմաթիվ վաճառակետեր կան, այնտեղ համեմատաբար էժան են պահեստամասերը: Մտավախություն կա, որ այս մոլը, ինչպես սուպերմարկետների դեպքում եղավ, փոքր բիզնեսի համար գորշ ապագա է նախանշում: