Երևանի դպրոցների օպտիմալացումը միտված է կրթության որակի բարձրացմանը.նախարար

«ՀՀ կրթության և գիտության նախարարությունը քայլեր է ձեռնարկում Երևանի դպրոցներում կրթության որակը բարձրացնելու ուղղությամբ:Երևանի հանրակրթական ուսումնական հաստատությունների շուրջ 30 տոկոսը ներկայում գերբեռնված է, իսկ շուրջ 30-33 տոկոսը՝ թերբեռնված:  Խոսքն ընդհանրապես հանրակրթության համակարգն ավելի լավ վիճակի բերելու մասին է: Քաղաքային դպրոցները լիարժեք կսկսեն աշխատել, եթե ունենան մոտավորապես 300 աշակերտ: Երևանի դպրոցների շուրջ 30 տոկոսը գերբեռնված է, իսկ 30-33 տոկոսը՝ թերբեռնված: Դրա համար մենք խոսում ենք քաղաքային դպրոցների մասին»,- Ազգային ժողովում լրագրողների հետ զրույցում , անդրադառնալով քաղաքի դպրոցների օպտիմալացման մասին քննարկումներին,ասաց ՀՀ կրթության և գիտության նախարար Լևոն Մկրտչյանը: «Մարզերի դպրոցների վերաբերյալ նախարարությունը դեռ ծրագիր չունի: Մարզերում խնդիրները մի փոքր այլ են, իսկ դրանց լուծում տալու համար խորքային քննարկումներ ու ուսումնասիրություններ են անհրաժեշտ: Մենք խոսում ենք քաղաքային դպրոցներում կրթության որակը բարձրացնելու մասին, որովհետև այդտեղ ռեսուրսը տեսնում ենք: Իսկ մարզերում լուրջ խնդիրներ ունենք: 400 գյուղական դպրոց ունենք, որոնք 100-ից քիչ աշակերտ ունեն: Դեռ այս խնդիրը լուծելու ծրագիր չունենք մշակած, քննարկումների փուլում ենք: Գյուղական վայրերում ավտոմատ նման դպրոցները փակել կամ միավորելը ճիշտ չի լինի»,- ասաց Մկրտչյանը: