Քրիստոսն իր մահով ապացուցեց, որ մահը դեռ վերջը չէ, հայ զինվորը նույնպես.Աղվան Հովսեփյան/տեսանյութ/

«Նիգ Ապարան» հայրենակցական միության պատվավոր նախագահ Աղվան Հովսեփյանի անմիջական ջանքերի շնորհիվ երեկ՝հունիսի 2-ին,Սուրբ Խաչ եւ Սուրբ Երրորդություն Հույսի Խորան Հաղորդարանում կատարվեց խաչադրման հերթական արարողությունը: Սուրբ մայր Խաչի վրա տեղադրվեց 1717-րդ խաչը՝ հաջորդաբար խորհրդանշելով Հայաստանում քրիստոնեության ընդունման 1717-րդ տարին: Այսօրվա միջոցառումը բովանդակային առումով նույնն է, որեւէ առանձնահատուկ երանգ չկա, բայց այս տարի մասնավորվել է խաչքավորի կերպարը՝ հայ զինվորի մեջ։ Մեզ թելադրեց ապրիլյան պատերազմը, որտեղ հերթական անգամ մեր ժողովուրդը հաղթանակ տարավ, եւ ինքնին թելադրվեց, որ այս տարվա խաչքավորը պետք է լինի հայոց զինվորը, կառույց-հուշարձանի վրա 1717-րդ խաչը դնելուց հետո ասաց քննչական կոմիտեի ղեկավար, «Նիգ-Ապարան» հայրենակցական միության նախագահ Աղվան Հովսեփյանը՝ նշելով, որ պաշտպանության նախարարության հետ համագործացել են եւ ընտրել են յոթ խաչքավորների։ Այսօր այդ խաչն ավելացավ քրիստոնյա Հայաստանի տարիքին: Քրիստոսն իր մահով ապացուցեց, որ մահը վերջը չէ: Քրիստոսն իր մահով ապացուցեց, որ մահը դեռ մահ չէ, մահը ծնունդ է: Եվ մեր զինվորները նույնպես իրենց կյանքով, իրենց արյամբ, իրենց առողջությամբ ապացուցեցին, որ ամեն անգամ իրենք նոր ծնունդ են տալիս մեզ, մեր ժողովրդին, մեր հողին, ստեղծում են պայմաններ, որ մենք պարտավորությամբ ավելի սիրենք մեր երկիրը, արարենք, ստեղծագործենք, ծաղկեցնենք մեր երկիրը: Հիշեք այս օրը, մենք բոլորս պարտավոր ենք անել այդ ամենը մեծագույն խոնարհումով ու մեծագույն նվիրումով՝ այն արժեքներին, որոնց համար նրանք կռվել, զոհվել, արյուն են թափել: Շնորհավորում եմ բոլորիդ այս օրվա համար»: Հիշեցնենք, որ այսօր Արագածոտնի մարզի Ապարան քաղաքի մոտ գտնվող «Սուրբ Խաչ եւ Սուրբ Երրորդություն Հույսի Խորան Հաղորդարան» կառույց-հուշարձանի վրա տեղադրվեց 1717-րդ խաչը : Խաչքավորներն էլ քառօրյա պատերամի զինծառայողներն էին՝ Արման Ադամյանը, Արթուր Աղասյանը, Հարություն Բադալյանը, Ռաֆիկ Կրպեյանը, Նարեկ Մալխասյանը, Մարատ Պետրոսյանը եւ Սարգիս Ստեփանյանը։