Բունտը մոտ է. Փաշինյանի խորամանկ որոշումը կլիցքաթափի՞

Այս կառավարության, իշխող քաղաքական այս ուժի բերած ավերները անչափելի են։ Նիկոլ Փաշինյանի եւ ներկայիս իշխանությունների վարած քաղաքականության արդյունքում վերջին երեք տարիներին մենք կորցրել ենք ոչ միայն Ղարաբաղի պետականությունը, տարածքների զգալի մասը, ստացել ենք հազարավոր վիրավորներ, սպանվածներ, տասնյակ հազարավոր ընչազուրկներ։ Հայաստանի ինքնիշխանության մակարդակը զգալիորեն նվազել է: Նա այլեւս ոչ Ղարաբաղի անվտանգության երաշխավորն է, ոչ էլ սեփական անվտանգության երաշխավորը: Այլեւ զրկվել ենք մարդավարի ապրելու իրավունքից:
Վերջին երեք տարիների ընթացքում Հայաստանի պետական պարտքն աճել է տարեկան միջինը 1 մլրդ դոլարով։
Այս տարի մենք կանցնենք 9 միլիարդ դոլարի շեմը, իսկ հաջորդ տարի՝ 10 միլիարդ դոլարի շեմը։ Սա, ի դեպ, կազմում է Հայաստանի ՀՆԱ-ի 63.4 տոկոսը, ինչը շատ վտանգավոր, հատկապես, եթե հաշվի առնենք, որ նախկինում ստացված վարկերի համար կառավարությունը վճարում է նոր վարկերով:

Հիմա թմբկահարում են, թե որոշել են հունվարի 1-ից բարձրացնել նվազագույն կենսաթոշակը եւ նպաստները՝ 26.500 դրամը դառնալու է 28.600 դրամ։ Տարբերությունը՝ 2.100 դրամ։ Նաեւ մի քանի սոցիալական փոքր ենթախմբերի եկամուտն է մոտ այդքան ավելանալու։ Սա այն պարագայում, երբ ուժային կառույցները վերջին տարիներին դարձել են խոշոր հարկատու, քանզի շեշտակիորեն ավելացել է աշխատակիցների աշխատավարձերը, հետեւաբար՝ հարկերը, երբ ընդամենը ամիսներ առաջ խորհրդարանական ուսապարկերը իրենց պատգամավորական գումարը, կամ իրենց խոսքով ասած՝ ձեռքի փողը ավելացրեցին 200 հազար դրամով:
Սա այն պարագայում, երբ տարեկան գնաճը 10 տոկոսից պակաս չէ, սննդամթերքը թանկացել է 16 տոկոսով, բանջարեղենը 64 տոկոսով, ձուն՝ 27, ձուկը՝ 31, խոզի միսը՝ 40 տոկոսով։
480.000 թոշակառուներից միայն 19.200 մարդու թոշակն է բարձրանալու 2.100 դրամով։
Ակնհայտորեն մեր թոշակառուները, սոցիալապես անապահով մյուս խավերը եկող տարի ավելի վատ են ապրելու։ Աճելու է աղքատությունն ու ծայրահեղ աղքատությունը։
Սա է մեր քաղաքացիներին այս իշխանության խոստացած ապագան եւ երկրում տիրող վիճակը լավագույնս արտահայտում է պաշտոնական վիճակագրությունը՝
վերջին ինը ամիսներին մոտ 100.000 մարդ երկրից մեկնել ու չի վերադարձել։ Փոխարենը իշխանությունը պարգեւավճարները շարունակում են ստանալ, իրենց եկամուտներն աճում են։
Ոստիկանության ընդամենը մեկ բաժնին բյուջեով հատկացված սպասարկման վճարը մեկ միլիարդով ավել է, քան նախորդ տարիների ողջ կառույցին հատկացված գումարը: Փաշինյանը Հայաստանը դարձրել է ոստիկանապետություն, ընդամենը մի քանի հազար մարդու բարեկեցությունն ապահովելով պահում է իր իշխանությունը եւ ժողովրդին էլ կերակրում իր մանիպուլացիաներով, թե ամեն ինչ ժողովրդի համար է արվում: Եւ, ահա, այսպիսի ժամանակներում պատահական չէր, որ կառավարությունը Ամանրյա արձակուրդները կրճատեց եւ Նոր Տարին կնշենք ընդամենը երկու օր, հունվարի 2-ից կլինի աշխատանքային: Սրանք հասկանում են, որ ծայրաստիճան աղքատության այս մթնոլորտում տոնական օրերը չկրճատելը կարող է սոցիալական բունտ առաջացնել: Մարդիկ չեն կարողանալու ամեն տարվա պես ճոխ սեղաններ բացել համատարած այս աղքատության մեջ եւ այս տարվա Նոր Տարին տերպետրոսյանական ժամանակների նոստալիգիկ հիշողություններ է արթնացնելու, երբ պետության ղեկավարը էկրաններից էր խոսքում աղքատիկ սեղանների մասին: Մեզ մնում է միանալ պատգամավորներից մեկի մաղթանք-առաջարկին եւ դիմել նիկոլապաշտ հանրությանը՝ 52 տոկոս թանկացած սոխ կերեք ու լաց եղեք ձեր իշխանության վրա:

Անի Սահակյան