Իշխանությունը «վա բանկ» է գնում. գործի է դրվում պլան Բ-ն

Գյումրիում քաղաքային իշխանության ձևավորումը մոտենում է ավարտին։

Հոկտեմբերի 17-ի ՏԻՄ ընտրություններում իշխող «Քաղաքացիական պայմանագիր» կուսակցությունը հիշեցնենք՝ պարտվեց «Բալասանյան դաշինքին»․ ընդդիմադիր ուժը ստացել է քվեների 36,59 տոկոսը, «Քաղաքացիական պայմանագրի» օգտին քվեարկել է մոտ 30 տոկոսը։ Անցողիկ շեմը հաղթահարել է ևս 3 կուսակցություն։ Մինչ օրս սակայն պարզ չէ, թե ով կդառնա Գյումրիի քաղաքապետ, չնայած լուրերին, որ Զարթոնքը կոալիցիա կկազմի Բալասանյան դաշինքի հետ եւ վերջինից կընտրվի քաղաքապետ, այդուհանդերձ իշխանության գործողությունները չեն դադարում, ակնհայտ է՝ իշխանությունները գնում են վա-բանկ` փորձելով խլել Բալասանյանի ձեռքից վերջինիս հաղթանակը: Վերջին օրերին հայտնի դարձավ, որ հետապնդումներ են սկսվել Բալասանյանի եւ նրա կողմնակիցների նկատմամբ, իշխանությունն այդ մարդկանց սպառնում է քրեական գործերով:
Իշխանությունն ամեն քայլի գնում է՝ 8 հազար ձայն ստացած ուժին 130 հազարանոց քաղաքում իշխանությունը փոխանցելու համար՝ մոռանալով՝ «ժողովրդի ընտրության» մասին իր հանրահայտ շահարկումը: Հոկտեմբերի 29-ին հայտնի դարձավ, որ ծնունդով գյումրեց Նազելի Բաղդասարյանը ԱԺ պատգամավորի մանդատից հրաժարվելու դիմում է ներկայացրել, լուրեր կան, որ նա գործուղվում է Շիիրակ՝ մարզպետի պաշտոնը զբաղեցնելու: Իսկ գործող մարզպետը, որը գլխավորում էր ՔՊ ցուցակը մանդատից հրաժարվելու դիմում է ներկայացրել: Նշենք, որ ՔՊ ցուցակի երկրորդը Բաղդասարյանի եղբայրն է, իշխանական կուլիսներում արդեն խոսում են, որ Բաղդասարյանին ուղարկում են մարզ, որպեսզի ավելի կոշտ մեթոդներով Գյումրին նվաճի՝ կլինի դա նոյեմբերի 1-ին, երբ ՀՀ երկրորդ քաղաքը քաղաքապետ կընտրի, թե մոտ ժամաակներս, դա արդեն կարեւոր չէ: Խնդիրն այն է, որ կուսակցությունում մեծ է դժգոհությունը գործող մարզպետ Հովհաննես Հարությունյանից եւ ՔՊ-ի կրած պարտության ողջ պատասխանատվությունը փորձ է արվում նրա ուսերին կոտրել:
Քրեական գործերն ու ճնշումները միտված են նրան, որ ՔՊ-ն նախ նվաճի քաղաքապետի պաշտոնը, իսկ եթե ոչ, ապա Պլան Բ-ով՝ փոխքաղաքապետի, ոից հետո մարզային իշխանություն ստացած Բաղդասարյանը նույն մեթոդներով ավագանու երեք մանդատի առավելություն ստանա ու այդ տարբերակով զավթի քաղաքային իշխանությունը:

Նշենք, որ «Բալասանյան» դաշինքը, որը ստացել էր ձայների մեծամասնությունը քաղաքապետի պաշտոնում տեսնում է Վարդգես Սամսոնյանի թեկնածությունը, վերջինս ընտրություններում գլխավորում էր այս դաշինքի ցուցակը։ Իրականում քաղաքային իշխանությունը ստվերային ղեկավարելու է Սամվել Բալասանյանի որդին՝ Միսակ Բալասանյանը, ով հանդիսանում է կուսակցություն ստեղծողն ու ֆինանսավորողը։ Հիմա մնում է՝ ճակատին հազար գիր ունեցող Սամվել Բալասանյանը չընկրի կամ խաղեր չտա իշխանությունների հետ ու ժամանակի ընթացքում ինքնակամ չհանձնի քաղաքային իշխանությունը ՔՊ-ին:

Գյումրու քաղաքապետարանում պաշտոններ կստանան նաև «Զարթոնք» կուսակցության անդամները, որ ընտրությունների արդյունքներով երրորդն է և պաշտպանելու է «Բալասանյան» դաշինքի քաղաքապետի թեկնածությունը։
«Ապրելու երկիր» կուսակցությունը բացառել է համագործակցությունը որեւէ ուժի հետ, իսկ ՀՀԿ-ն դեմ է միայն ՔՊ-ի հետ համագործակցությանը:

Անի Սահակյան