Երկու դիկտատորներին սաստող չկա, միայն ճառեր՝ «0» ազդեցությամբ
Հայաստանի հետ հարաբերությունների կարգավորման հարցում Թուրքիան կխորհրդակցի Ադրբեջանի հետ, երեկ հայտարարել է Թուրքիայի արտգործնախարար Մևլութ Չավուշօղլուն CNN Turk-ի հետ զրույցում: «Այդ հարցը մենք քննարկել ենք Ադրբեջանի նախագահ Ջեյհուն Բայրամովի հետ նախագահ Ռեջեփ Թայիփ Էրդողանի Ֆիզուլի կատարած վերջին այցի ժամանակ: Այդ ուղղություններով մենք խորհրդակցում ենք Ադրբեջանի հետ: Միևնույն ժամանակ Հայաստանից էլ դրական ազդակներ են եկել: Մենք մեր հերթին հայտարարել ենք, որ Հայաստանի դրական քայլերին պատասխան կտանք, իսկ թե ինչ քայլեր մենք Ադրբեջանի հետ կձեռնարկենք, դա նույնպես քննարկում ենք»,- ասել է Չավուշօղլուն: Նա նաև նշել է, որ Ադրբեջանը Հայաստանին առաջարկել է խաղաղության համաձայնագիր կնքել, բայց Հայաստանում այդ հարցով «որևէ դրական շրջադարձ տեղի չի ունեցել»: «Այնուամենայնիվ, բոլորը պետք է հասկանան, և Հայաստանում էլ դա սկսել են հասկանալ, որ այն որոշումները, որ մենք կընդունենք, այն քայլերը, որ կձեռնարկենք, կանենք Ադրբեջանի հետ համատեղ»,- ասել է Չավուշօղլուն:
Այսինքն, Անկարան շարունակում է ոչ միայն պայմաններ թելադրել պաշտոնական Երևանին, այլև զգուշացնում, որ Հայաստան-Թուրքիա հարաբերությունների կարգավորումը, հայ-ադրբեջանական համաձայնագրի ստորագրումը դրանք մեկ փաթեթի մեջ են, ու կախված Հայաստանի քայլերից՝ Անկարան կորոշի՝ Հայաստանի հետ հարաբերություններ հաստատի, թե ոչ:
Ու այսպես, Հայաստանը ստիպված է լինելու լսել Անկարայից նման պահանջներ, քանի դեռ չեն բավարարվել թուրք-ադրբեջանական զույգ իշխանությունների քմահաճությունները:
Ալիևն էլ իր հերթին շնորհավորական նամակ է հղել Թուրքիայի նախագահ Ռեջեփ Թայիփ էրդողանին Թուրքիայում Հանրապետության օրվա կապակցությամբ: «Ադրբեջանի և Թուրքիայի միջև բարեկամական և եղբայրական հարաբերությունները, որոնք հիմնվում են այնպիսի ամուր հիմքերի վրա, ինչպիսիք են ընդհանուր պատմությունը և մեր ժողովուրդների ազգային-բարոյական արժեքները, մեր միասնականության և համերաշխության վառ արտահայտումն են: Այսօր մենք ականատես ենք լինում այդ հարաբերությունների պատմական շրջանի: Շուշիի հռչակագրում շարադրված ուղղությունների և նպատակների համաձայն՝ մեր դաշնակցային հարաբերությունները օր-օրի ընդլայնվում են և հարստանում նոր բովանդակությամբ»,- ասել է Ալիևը: Նա նաև հավելել է, որ Թուրքիայի նախագահի և ժողովրդի վճռական, անվերապահ քաղաքական և բարոյական աջակցությունը մեծ դերակատարություն է ունեցել «Ադրբեջանի՝ իր հողերի ազատագրման պայքարում»: «Թուրք-ադրբեջանական համերաշխությունը ևս մեկ անգամ ցույց տրվեց ողջ աշխարհին և մեր ժողովուրդը երբեք չի մոռանա այդ աջակցությունը»,- ասվում է շնորհավորական ուղերձում:
Թուրք-ադրբեջանական տանդեմը ողջ աշխարհին ցույց է տալիս, թե ինչ հավակնություններ ունեն, ինչպես են ցանկանում ազդեցություն մեծացնել Հարավային Կովկասում:
Չնայած ողջ քաղաքակիրթ աշխարհը գիտի, թե ինչպես էր Թուրքիան կանգնած Ադրբեջանի թիկունքին, ու այսօր էլ Հայաստանի տարածքների նկատմամբ հավակնություններով են հանդես գալիս, որքան էլ քննադատական հոդվածներ հրապարակվեն Էրդողանի ու Ալիևի մասին, միևնույն է՝ երկու դիկտատորներին իրենց տեղը ցույց տվող չկա: Էրդողանին, մանավանդ, հակադրվում են, երբ տվյալ երկիրը ինչ-որ շահ ունի Անկարայի, ինչ-որ խնդիր ունի լուծելու...
Մետաքսյա Շալունց
Հետևեք մեզ Viber-ում
