Փաշինյանը հայտարարեց՝ Շուշին ու Հադրութն «օտար տարածքներ» են
2022 թվականի պետական բյուջեն ներկայացնելիս Նիկոլ Փաշինյանը պաշտպանական բլոկը ներկայացնելիս հայտարարել է, թե չունի օտար տարածքներ զավթելու ծրագիր: Կոսելով տարածաշրջանում անվտանգության կայուն միջավայր ստեղծելու անհրաժեշտության մասին, ասել է՝ Հայաստանը զարգացնելու և բարեփոխելու է իր զինված ուժերը ոչ թե ագրեսիայի, այլ ագրեսիայից պաշտպանվելու համար։ «Հայաստանը չունի օտար տարածքներ զավթելու ծրագրեր, իսկ անվտանգության համակարգի զարգացման տեսանկյունից կարևոր է ոչ միայն բանակի արդիականացումը, այլև արտաքին բարենպաստ միջավայրի ձևավորումը, . Հայաստանի, Արցախի և տարածաշրջանի համար խաղաղ դարաշրջան բացելու օրակարգի հետևողական իրականացումը»,- հավելել է նա։
Այս խնդրի լուծումը Փաշինյանը տեսնում է թշնամական մթնոլորտի հաղթահարման, ԵԱՀԿ Մինսկի խմբի համանախագահների հովանու ներքո Լեռնային Ղարաբաղի շուրջ բանակցությունների վերսկսման և տարածաշրջանում տնտեսական ու ենթակառուցվածքային հաղորդակցությունների ապաշրջափակման մեջ։
Նա կարծում է, որ այս ապաշրջափակումը կարող է որակապես փոխել Հայաստանի տնտեսության բովանդակությունն ու կառուցվածքը, ապահովել երկարաժամկետ ներառական տնտեսական աճ:
Փաշինյանը չի հստակեցրել՝ ինչ նկատի ունի «օտար տարածքներ» ասելով, իսկ քանի դեռ դա պարզաբանված չէ, այսպիսի հայտարարություն անել այն մի իրավիճակում, երբ 44-օրյա պատերազմից հետո հայկական մի բազում տարածքներ ենք թողել թշնամում, ընդ որում՝ տարածքներ, որոնց հայկականությունը չեն վիճարկվում, կնշանակի բաց տեքստով հայտարարել, որ մենք այլեւս տարածք չունեն վերադարձնելու եւ դրանք բոլորը՝ Շուշիից ու Հադրութիս սկսած օտար են եւ մենք դրանք վերադարձնելու կամ ինչպես Փաշինյանը կասի՝ նվաճելու ցանկություն ու մտադրություն չունենք:
Դեռեւս օգոստոսին խորհրդարանում հարցուպատասխանի ժամանակ ընդդիմադիր պատգամավոր Քրիստինե Վարդանյանը Փաշինյանին հիշեցրեց, որ պատերազմից հետո ինչ հայտարարություն ասես արել է ՝ արդարացնելու հանձնված տարածքները, Շուշին անգամ դժբախտ ու դժգույն է համարել, ապա հարց ուղղեց՝ կարո՞ղ եք ասել, որ Շուշին ու Հադրութը ժամանակավորապես օկուպացված են Ադրբեջանի կողմից: Նիկոլ Փաշինյանը երկար-բարակ պատասխանեց՝ ըստ էության չասելով, որ դրանք օկուպացված են. «Մեր ասելիքը ձեւակերպված է կառավարության ծրագրում եւ, եթե դուք լսեցիք, ես ասացի, որ կառավարության ծրագիրը ձեւակերպված է այն առավելագույնս համապատասխանեցնելու համար բանակցային մթնոլորտի եւ միջավայրի վերականգնմանը եւ Հայաստանի հանրապետության եւ Արցախի շահերը պաշտպանելուն: Դուք ասում եք՝ հայտարարություններով սպառնալիք եք ստեղծում մեր բոլոր անվտանգության համար, հիմա ձեր նպատակը ի՞նչ է, որ ես հայտարարություն անեմ, որով սպառնալիք ստեղծվի Արցախի եւ Հայաստանի հանրապետության անվտանգության համար: Սա ռազմահայրենասիրական թեմաներով ելույթներ ունենալու երեկույթ չէ: Մենք շատ լուրջ հարց ենք քննարկում եւ մեր հայտարարություններն ունեն ուղղակի ազդեցություն տարածաշրջանում միջավայրի եւ ռազմաքաղաքական իրադրության վրա: Ես ասել եմ, որ Հայաստանի քաղաքացիներից ռազմահայրենասիրական ոտանավոր ասելու մանդատ չեմ ստացել, այլ ստացել եմ մանդատ՝ Հայաստանի հանրապետության համար խաղաղ զարգացման դարաշրջան բացելու եւ ես անշեղորեն գնալու եմ այդ ճանապարհով»:
Հիմա նման հայտարարություններով Փաշինյանն ասում է ճիշտ հակառակը՝, որ դրանք օտար տարածքներ են եւ մենք նվաճելու մտադրություն չունեն ու ռազմական բյուջեն էլ այդ համատեքստում չի ձեւավորվել:
Անի Սահակյան
Հետևեք մեզ Viber-ում
