Ձյուն գա գլխիդ

ՀՀ նախագահ Արմեն Սարգսյանը «Թվիթերի» իր էջում շնորհավորել է հայկական արմատներով ամերիկյան հեռուստաաստղ Քիմ Քարդաշյանին ծննդյան օրվա առթիվ:
«Սիրելի Քիմ Քարդաշյան, ուրախ եմ, որ նույնիսկ գտնվելով այդքան հեռու՝ հիանալի զգում ու հասկանում ես, որ Հայաստանը մեր՝ իմ, քո և բոլորիս հայրենիքն է։ Մաղթում եմ երջանկություն և ամենայն բարիք»,- գրել է ՀՀ նախագահի պաշտոնը զբաղեցնող սույն անձնավորությունը։
2015-ից հայ ժողովրդի վզին փաթաթված քաղաքական չարիքը օրեցօր անտանելի է դառնում։ Պետության թիվ մեկ տուրիստը ոչ միայն սկսել է անտարբեր դառնալ մեր երկրի խնդիրներին ու մարտահրավերներին, այլ կարծես բացահայտ ծաղրում ու նվաստացնում է հայ ժողովրդին ու Հայաստանը։ Հազարումի խնդիրների տակ կքած պետությունում փաստորեն այս օրերին ամենանշանակալից իրադարձությունը Քիմ Քարդաշյանի ծննդյան տարեդարձն է, որը հիշեցնել տվեց հայաստանյան այս անիմաստ պաշտոնյայի գոյությունը, լսելի դարձրեց նրա ձայնը։ Ինչպես կասեր ժողովրդական խոսքը՝ ձյուն գա գլխիդ, այո, ձյուն գա, որ Նիկոլ Փաշինյանն էլ այդ ձնածածկ տարածքը հանձնի թշնամուն, ինչպես մեր սահմանները, որոնց մասին ասում էր, թե ձյունը դրած է հնարավոր չէր ինժիներական աշխատանքներ տարել, իսկ մինչեւ ձյունը կհալչեր, թուրքը մտավ Սեւ լիճ ու Գեղարքունիք։

Արմեն Սարգսյանն իրեն ռետինե խողովակի տեղ է դրել բոլոր լարված ու բախտորոշ իրավիճակներում՝ սկսած պատերազմից վերջացրած հետպատերազմական զարգացումերով։
Սրան, փաստացի, չեն հետաքրքրում այնպիսի «մանր» հարցեր, ինչպիսին են Արցախի պետականության կորուստը, Հայաստանի ինքնիշխանության ոչնչացումը, հայ–ադրբեջանական զարգացումները, Գորիս–Կապան ճանապարհահատվածի ադրբեջնականացված մասը, մարդկանց սոցիալական վիճակի վատացումը, գնաճը , այս մարդը խոշոր, մասշտաբային հարցերով է զբաղված, ինչպիսին Քիմ Քարդաշյանն է ու իր հանրահայտ հետույքը, այս մարդը հետույքագետ է եւ կյանքի բոլոր իրավիճակներում կարողանում է այնպես կողմնորոշվել, որ հարմարավետ տեղավորվի ինչ-որ մեկի այդ հարմարավետ վայրում ու իրեն ապահով զգա։
Էլիտար տուրիստ և ձրիակեր նախագահը, որն այս աղետի ուղիղ պատասխանատուներից և համահեղինակներից է պատերազմի առաջին օրվանից դակում է հակաօրինական, հակասահմանադրական ու անտրամաբանական որոշումները։ Նա պաշտոնի համար ուրացավ բոլորին և ամեն ինչ՝ պաշտոնը վեր դասելով տղամարդկային արժանապատվությունից ու հայրենիքից:

Անի Սահակյան