Տղաները չկան, Արցախը հանձնել ենք․ լուծումը բավարարում է բոլորին

Սյունիքի մարզի Փայլասար տեղանքն ադրբեջանական վերահսկողության տակ է: Այս մասին NEWS.am-ի հետ զրույցում հայտնել է Կապանի քաղաքապետի ռազմական գծով տեղակալ Մեսրոպ Արզումանյանը:

«Ես արդեն երկու օր է՝ հեռու եմ և այսօրվա իրավիճակին չեմ տիրապետում: Ես ընդամենը զեկուցել եմ, որ ճանապարհը փակ է, հետագայում պայմանավորվածությունից հետո նորից թույլ են տվել վերակարգը շարժվի, մինչեւ նոր ճանապարհ կառուցվի և մեր վերակարգն արդեն մեր ճանապարհով շարժվի»,- ասել է նա՝ հավելելով, որ այո, այդ բարձունքը ռազմակավարական նշանակություն ունի թե՛ Կապանի, թե՛ հարակից գյուղերի համար՝ Ագարակ, Խդրանց, Դիցմայրի:

Իսկ նոր Տաթև-Աղավնո ճանապարհի կառուցման մասին խոսել է տարածքային կառավարման նախարար Գնել Սանոսյանը Հայ-ռուսական միջտարածաշրջանային ութերորդ համաժողովի ժամանակ ԶԼՄ-ների հետ զրույցում։ Ըստ նախարարի՝ շինարարական աշխատանքներն ընթանում են շուրջօրյա, և ճանապարհը պատրաստ կլինի մինչև տարեվերջ։ Փաստորեն իշխանություններն արդեն ամբողջապես հարմարվել և հաշտվել են Գորիս-Կապան ճանապարհը ադրբեջանական ենթակայության տակ թողնելու մտքին և դրա փոխարեն կառուցվող այլընտրանքային՝ Տաթևի ճանապարհը ներկայացնում են որպես հաղթական ձեռքբերում։

Հատկանշական է, որ ռուսական կողմը Հայ-ռուսական միջտարածաշրջանային ութերորդ համաժողովի ժամանակ Ռուսաստանի տնտեսական զարգացման փոխնախարար Դմիտրի Վոլվաչը հայտարարեց, թե Ռուսաստանն առաջիկայում պլանավորում է 1 միլիարդ դոլար ներդնել Հայաստանի տնտեսության մեջ: «2021 թվականին մեր երկրների միջև առևտրաշրջանառության վերականգնման տեմպերը վատ չեն՝ 17 տոկոս: Դա այն դեպքում, երբ մենք 4 տոկոս անկում ունեինք համավարակի տարում: Մեր համագործակցությունը զարգանում է ներդրումների ոլորտում՝ ավելի քան 2.2 միլիարդ դոլար համատեղ կուտակված ներդրումներ Ռուսաստանից Հայաստան: Մենք գիտենք, որ կան 1 միլիարդ դոլարի հստակ ծրագրեր, որոնք մոտակա ժամանակահատվածում կներդրվեն Հայաստանի տնտեսության մեջ»,- նշել է նա։

Վոլվաչը հայտնել է, որ ներդրումները կլինեն էներգետիկայի, ենթակառուցվածքների և տրանսպորտի ոլորտներում: Նրա խոսքով՝ ներդրումները շատ կարևոր կլինեն Հայաստանի և Ռուսաստանի միջև տնտեսական, սոցիալական և մշակութային հարաբերությունների զարգացման համար: Ի լրումն այս ամենի՝ ռուսական կողմը նաև ցանկություն է հայտնել մասնակցություն ունենալ Հայաստանում հյուսիս-հարավ ճանապարհի կառուցմանը։ Մինչ այդ՝ Իրանն էր հայտարարել հյուսիս-հարավ ճանապարհի շինարարությանը մասնակցություն ունենալու մասին։ Իսկ Եվրոպական միությունն էլ 2,6 մլրդ դրամի վարկային և դրամաշնորհային աջակցության մասին է հայտնել։

Ինչու մինչ արցախյան 44-օրյա պատերազմը չէին արվում այդ հայտարարությունները։ Ենթադյալ ներդրումներին և շոշափելի աջակցության ծրագրերին խանգարում էի՞ն Արցախն ու դրա պաշտպանության համար ընկած շուրջ 5000 տղանե՞րը։ Կորցրել ենք Արցախը, մի ողջ լուսավոր սերունդ հանձնված է հողին, կամ դարձել խեղված ու հաշմանդամ։ Ստցաված լուծումը բավարարում է բոլոր կողմերին՝ ներառյալ Հայաստանի այսօրվա իշխանությանը, ուստի բոլորը կարող են ապրել գոհ ու երջանիկ։

Հայկ Դավթյան