Նիկոլ Փաշինյանը կփոխի անձնագիրը

Ոստիկանությունը հանրային քննարկման է ներկայացրել նոր նախագիծ, որով նախատեսվում է փոփոխություն կատարել անձանգրի տրամադրման մասին Կառավարության որոշման մեջ։
Ներկայումս ՀՀ կառավարության 1998 թվականի դեկտեմբերի 25-ի թիվ 821 որոշման համաձայն՝ Հայաստանի Հանրապետության քաղաքացու անձնագիրը տրամադրվում է 10 տարի վավերականության ժամկետով, բացառությամբ մինչև 16 տարեկանների, ինչպես նաև զինապարտ քաղաքացիների:
Նոր նախագծով առաջարկվում է ՀՀ քաղաքացու անձնագրի վավերականության ժամկետը սահմանել 2 տարի, մինչ այժմ սահմանված 10 տարվա փոխարեն։
Թե որն է նման որոշում կայացնելու հիմնական պատճառը և անհրաժեշտությունը, որոշման նախագծում չի նշվում։

Ուշագրավ է, որ նախագծին կից ներկայացված հիմնավորման մեջ նշվում է, թե նախագիծը չի բխում որևէ ռազմավարական փաստաթղթից:
Միաժամանակ ըստ ոստիկանության ներկայացրած հիմնավորման՝  «Հայաստանի Հանրապետության կառավարության 1998 թվականի դեկտեմբերի 25-ի թիվ 821 որոշման մեջ փոփոխություն կատարելու մաuին» ՀՀ կառավարության որոշման նախագծով կսահմանվի 2 տարի առավելագույն ժամկետ Հայաստանի Հանրապետության քաղաքացու անձնագրի համար, դրանով իսկ կիրագործվի Պետաիրավական նախարարական կոմիտեի 29.09.21թ. նիստում տրված հանձնարարականը (ԿԱ/174-2021):
Այս տարվա սեպտեմբերի 21-ի հանձնարարականը, որի մասին նշվում է հիմնավորման մեջ, փակ է, այն չի հրապարակվել։
Դատելով այն բանից, որ ի կատարումն հիշյալ հանձնարարականի որոշվել է 5 անգամ նվազեցնել ՀՀ քաղաքացիների անձնագրային ժամկետները, պետք է ենթադրել, որ նախկինում գործող 10 տարվա ժամկետը պետական անվտանգության հետ կապված որոշակի խնդիրնեեր է առաջացրել, ինչով պայմանավորված էլ հանձնարարականը գաղտնի է։

Հավանական է, որ իշխանությունը նման քայլի է դիմում գնալով ավելի մեծ թափ ստացող արտագաղթը կանխելու և բնակչության թիվը կառավարելի պահելու նպատակով։ Իսկ որ արտագաղթելու ցանկություն ունեցողների քանակը անընդհատ աճում է, կարելի է համոզվել անգամ շրջապատի մարդկանց հարցուփորձ անելով։
Մի խոսքով՝ Նիկոլ Փաշինյանի խոստացած ապագան արդեն եկել է և այն շատ կոնկրետ արտահայտություն է գտնելու հեղափոխական իշխանությանը ձայն տված Հայաստանի Հանարապետության հպարտ քաղաքացու անձնագրում։
Երկու տարով անձնագիրը կլինի նոր Հայաստանի անփոխարինելի բրենդը։ Նիկոլ Փաշինյանը որպես այդ բրենդի առաջին շահառու կարող է հրապարակավ փոխել անձնագիրը՝ վերցնելով նորը՝ 2 տարով։ Դրանից հետո հերթը կհասնի մյուսներին։ Վայելեք սպասվող պահը, տղանե՛ր և աղջիկնե՛ր։

Հայկ Դավթյան