Ծեծկռտուքներ՝ ոստիկանության բարձրաստիճան պաշտոնյաների մասնակցությամբ․մեկի աչքն է դուրս եկել, մեկ ուրիշի ոտքի ջիլը կտրվել

Hayeli.am-ի տեղեկություններով՝ վերջին երկու ամսվա ընթացքում երկու աղմկահարույց ծեծկռտուք է տեղի ունեցել ոստիկանության բարձրաստիճան պաշտոնյաների մասնակցությամբ, ինչը, բնականաբար, փորձ է արվել հույժ գաղտնի պահել։ Ընդ որում՝ երկու դեպքում էլ ծեծկռտուքների ելքերը եղել են բավականին լուրջ մարմնական վնասվածքները, որոնք ստացել են հենց ոստիկանության պաշտոնյաները։

Այսպես․ շուրջ 2 ամիս առաջ Երևանում՝ Չարբախի ռեստորաններից մեկում, հավաքված են եղել Ոստիկանության Շենգավիթի բաժնի պետ Կարեն Բունիաթյանը, Ոստիկանության Շենգավիթի բաժնի Չարբախի բաժանմունքի պետ, ոստիկանության փոխգնդապետ Արման Կիրակոսյանը, Մաշտոցի բաժնի պետ Անդրանիկ Շահբազյանը, Երևանի նախկին ոստիկանապետ Գարիկ Ղուկասյանը։ Ուտել-խմելուց հետո՝ արդեն ոչ սթափ վիճակում, վերջիններս սկսել են աղմկել՝ այդպիսով անհարգալից վերաբերմունք դրսևորելով ռեստորանի մյուս հաճախորդների նկատմամբ։ Դա առաջացրել է հարևան սեղանին նստած երիտասարդների զայրույթը, և սկսված վիճաբանությունը փոխակերպվել է ծեծկռտուքի։ Բանը հասել է այնտեղ, որ Մաշտոցի բաժնի պետի աչքը դուրս է եկել, և նա վիրահատության է ենթարկվել։ Սակայն, քանի որ, պաշտոնյաները ևս խնդիր են ունեցել կատարվածը ծածկադմփոց անելու, երիտասարդներին հանգիստ են թողել, և ծեծկռտուքն իրավական հետևանք չի ունեցել։

Եվս մեկ ծեծկռտուք՝ այս անգամ արդեն հենց պաշտոնյաների միջև, գրանցվել է օրերս, Կոտայքի մարզում։ Աբովյան քաղաքում գտնվող «Օրիգինալ» ռեստորանում քննիչների օրվա առթիվ հավաքված են եղել Ճանապարհային ոստիկանության Կոտայքի հաշվառման քննական բաժանմունքի պետ Էդգար Գրիգորյանը, ոստիկանության Կոտայքի բաժնի պետ Սարիբեկ Ռուստամյանը, Աբովյան քաղաքի քննչական բաժնի պետը։ Ինչպես նախորդ դեպքում, այս անգամ ևս, կերուխումի վերջը դարձել է վիճաբանությունը, նույնիսկ կռվի մասնակիցներն իրենք երկու անգամ ոստիկանություն են ահազանգել։ Ի դեպ, ծեծկռտուքն այն աստիճանի է թեժացել, որ Սարիբեկ Ռուստամյանի՝ Սարոյի ոտքի ջիլը կտրվել է։

Հատկանշական է, որ շաբաթ օրը՝ հոկտեմբերի 16-ին, Սարոն նշանակվել է Արարատի մարզային վարչության պետ։ Թե ո՞ր հերոսության համար, թերևս միայն ոստիկանապետ Վահե Ղազարյանին է հայտնի։ Գուցե այն բանի, որ թեև Ղազարյանը տեղյակ է ծեծկռտուքների դեպքերի մասին, բայց Սարոն կարողացել է իրեն հիմարեցնե՞լ։ Դե, մեր տեղեկություններով, թաքցնելու համար ոտքի ջլի կտրվելու փաստը, Սարոն ոստիկանապետին թուղթ է ուղարկել, իբրև թե վարակված է կորոնավիրուսով և բնական է, որ ինչ-որ մի ընթացք կկարողանա խուսափել աշխատանքի ներկայանալուց և Ղազարյանի աչքին երևալուց։

Ստացվում է, որ ընդամենը հոկտեմբերի 15-ին ոստիկանության 2021 թվականի 9 ամիսների օպերատիվ-ծառայողական գործունեության արդյունքները ճոռոմ խոսքերով ամփոփող ոստիկանությունն ու իր բարձրաստիճան պաշտոնյաները հենց իրենք են ծածկադմփոց անում հանցագործությունների այսքան ակնհայտ դեպքերը, դեռ մի բան էլ ծեծկռտուքի մասնակիցներին նորանոր պաշտոններում են նշանակում՝ համակարգը նրանցից մաքրելու փոխարեն։