ԵԽԽՎ-ում թուրք ու ադրբեջանցի պատվիրակներով քաղաքական խումբ ստեղծելու նախաձեռնությունը տապալվել է

ԵԽԽՎ-ում այսօր Բյուրոյի նիստին թուրք և ադրբեջանցի պատվիրակներով քաղաքական նոր խումբ ստեղծելու նախաձեռնությունը տապալվել է, Aysor.am-ի թղթակցի հետ զրույցում Ստրասբուրգից փոխանցեց ՀՀ ԱԺ փոխնախագահ, ԵԽԽՎ-ում հայաստանյան պատվիրակության ղեկավար Արփինե Հովհաննիսյանը: Նրա խոսքով՝ ԵԽԽՎ-ում իտալացի պատվիրակներից մեկը նախաձեռնել էր «Ազատ դեմոկրատներ» անվանումից նոր քաղաքական խումբ ստեղծել, որի կազմում ճնշող մեծամասնությունը թուրքեր էին, ադրբեջանցիներ, ինչպես նաև՝ սերբ Միլիցա Մարկովիչը: Վերջինը, նկատենք, հայտնի է հակահայկական դիրքորոշմամբ, մասնավորապես, նա էր հեղինակել Սարսանգի ջրամբարին վերաբերող բանաձևը: «Ակնհայտորեն ուզում էին այդ խումբը ստեղծել ինչ-որ մարդկանց այդ տանիքի ներքո հավաքելու համար, սակայն Բյուրոյում 11 դեմ, 4 կողմ ձայնով այդ նախաձեռնությունը չընդունվեց», - ասաց Հովհաննիսյանը: Որոշումը չընդունելու պատճառը, ըստ Ա. Հովհաննիսյանի, երկուսն էին. նախ նշել էին, որ հուլիսի 1-ից է այդ խումբը ստեղծված համարվում, մինչդեռ այդ ժամանակ 17 անդամները այլ քաղաքական խմբերի անդամ էին: Իսկ երկրորդ պատճառն այն է եղել, որ պարզել են, որ նոր խմբի կանոնադրությունը արտատպված է: «Բյուրոյում նրանց մեղադրեցին նաև հեղինակային իրավունքների խախտման մեջ. պարզվեց ԱԼԴԵ-ի կանոնադրությունն է copy paste արված», - փոխանցեց ՀՀ ԱԺ փոխնախագահը: