Նալբանդյանն իր «ոտքը կարպետի չափ» է մեկնում

«Մենք մեր հնարավորությունների համաձայն ենք մեր ոտքը մեկնում, որոշ արդյունքներ կան, բայց գոռգոռալ, որ վաղը մենք այս կամ այն կանենք, այդպիսով ոչ մի բանի չենք հասնի», - ԱԺ-ում ասաց ՀՀ ԱԳ նախարար Էդվարդ Նալբանդյանը՝ պատասխանելով «Ծառուկյան» խմբակցության քարտուղար Վահե Էնֆիաջյանի հարցին, թե ի՞նչ քայլեր են ձեռնարկվել ապրիլյան պատերազմից հետո սահմանին լարվածությունը մեղմացնելու համար: «Վիեննայի և Սանկտ Պետերբուրգի գագաթաժողովների արդյունքում կայացրած որոշումները նույնն էին, ինչ՝ ՀՀ նախագահն էր ասում։Երբ եռանախագահող երկրների կողմից ասվեց, թե պետք է հետաքննության մեխանիզմ ստեղծվի, դա այն էր, ինչ Հայաստանն էր ասում։ Կարծո՞ւմ եք՝ դա օդից է լինում: Դա համապատասխան աշխատանքի արդյունք է», - նշեց նա: Ադրբեջանը նախ պատասխանատու է միջազգային հանրության առջև,ասաց նա պատասխանելով Ադրբեջանի ագրեսիայի մասին հարցին: Ինչ վերաբերում է Թուրքիայի հետ բանակցություններին, նախարարը նշեց. «Կարելի է փիլիսոփայական պատասխաններ տալ Ձեր հարցերին։ Շատերն ասում են՝ Թուրքիային պետք է ստիպել, ոչ թե դիվանագիտական հարաբերություններ հաստատել, այլ ստիպել, որ ինքը ճանաչի Հայոց ցեղասպանությունը: Դե գնացեք ստիպեք, տեսնեմ՝ ինչպես եք ստիպելու: Մենք դա կարող ենք անել, եթե միջազգային հանրությունը մեզ միանա, իսկ այսօր այն մեզ միացել է»: Նալբանդյանը նաև հավելեց, որ բանակցել պետք է բոլոր երկրների հետ անխտիր, որովհետև միայն  բանակցությունների և  երկխոսության արդյունքում կարող են հարցերը լուծվել: