Նիկոլ Փաշինյանի ինքնախոստովանական ցուցմունքը՝ ամեն ինչում ես եմ մեղավոր

Կառավարության հոկտեմբերի 7-ի նիստում վարչապետի աթոռը զավթած Նիկոլ Փաշինյանի պատվաստումների թեմայով ցուցադրած շոուն ավելի շատ իր դեմ օգտագործվեց: Հիշեցնենք՝ երբ առողջապահության նախարար Անահիտ Ավանեսյանն ասաց, որ կորոնավիրուսի դեմ պատվաստումները դանդաղ են ընթանում, քանի որ որոշ մարդիկ բացասական, հակապատվաստումային ինֆորմացիոն դաշտ են ձեւավորում, այդ մասին քարոզչություն անում, Նիկոլ Փաշինյանը հունից դուրս եկավ, սկսեց գոռգոռալ, թե իրեն չի հետաքրքրում, պահանջեց՝ այսուհետ չդժգոհել ու արդյունք ապահովել:
«Խնդիր եմ դրել, գնացեք լուծեք։ Վատ ա, շատ վատ ա պատվաստման թվերը, և որևէ ուրիշ մեկից չբողոքեք։ Եվ վերաբերում ա դահլիճում նստած բոլոր մարդկանց», մասնավորապես ասաց Փաշինյանը հավելելով.«Մենք ամեն անգամ կառավարության նիստում պիտի ասենք չորս հոգի կամ հարյուր հոգի ինչ-որ բա՞ն ա ասում։ Ես ձեր առաջ խնդիր եմ դրել, ինձ մի ասեք ով ա խանգարում, ով չի խանգարում։ Գնացեք լուծեք, առողջապահության նախարարությունը, պետական մնացած մարմինները... մենք հո ստեղ չե՞նք հավաքվել՝ ասելու, որ ինչ-որ մարդիկ խանգարում են մեզ գործել։ Ոչ մեկ չի կարող մեզ խանգարել գործել»։
Ուժայիններին էլ հանձնարարեց՝ զբաղվել հակաքարոզչության հեղինակներով:
«Ազգային անվտանգության ծառայությանը և ոստիկանությանը. կեղծ պատվաստումների մասին ես էլ ահազանգ չլսեմ։ Ձերբակալե'ք, կալանավորե'ք։ Էդ բժիշկները, ովքեր որ օգտվում են առիթից չպատվաստելու մարդկանց և պատվաստանյութը փչացնելու համար... շատ խիստ է միջոցներ ա պետք ձեռնարկել։ Գլխավոր դատախազին եմ դիմում, նաև՝ մեր քննչական մարմիններին», - ասաց Փաշինյանը։ Նա պահանջեց՝ ետական համակարգում չատվաստված մարդ չտեսնի:
Ավելի ուշ պարզ դարձավ, որ իշխանությունը մտադիր է չպատվաստվածների դեպքում քովիդի բուժումը վճարովի դարձնելու մասին: Անգամ թվեր են նշում` մեկ անձի բուժումը 800 հազար դրամ կարժենա: Մի կողմ թողնենք, որ ամենաբարձր մակարդակով տեռոր է հայտարարվում ՀՀ բնակչության նկատմամբ, Նիկոլ Փաշինյանը սպառնում է կալանավորել բոլոր նրանց, ովքեր օբյեկտիվորեն խոսում են պատվաստման նպատակահարմարության մասին, մի կողմ թողնենք, որ նա բռնապետական պարտադրանք է դրսեւորում պետական աշխատողների նկատմամբ, որոնք փաստորեն , իրավունք ունեն կամ պատվաստվել կամ ՊՌՇ թեստ հանձնել համաձայն առողջապաության նախարարի հրամանի: Այս փոքրիկ միջադեպը խոսում է այն բանի մասին, որ այո, սին են Նիկոլ Փաշինյանի երեք տարիների բոլոր արդարացումները, բոլոր հարցերում, եւ հատկապես պատերազմի վերաբերյալ: Երեք տարի շարունակ մենք նրանից լսում ենք, որ այսինչ հարցում նախկինների այս խումբը խանգարեց, այնին հարցում՝ մյուս խումբը, որ պատերազմը տանուլ տվեցինք, որովհետեւ նախկին <<դավաճանները>> խոչընդոտեցին: Մի խոսով՝ երեք տարի է մենք նրանից լսում ենք, որ իր անհաջողության համար մեղավոր են բոլորը, բացի իրենից:
Նիկոլ Փաշինյանն ըստ էության ինքնախոստովանական ցուցմունք տվեց՝ ապացուցելով, որ ոչ մեկ եւ ոչինչ չէին կարող խոչընդոտել իրեն, երբ պետական բոլոր լծակները սեփական ձեռքերում է:

Անի Սահակյան