Հերթական խայտառակ գաղտնազերծումը. Ալիևը «արևմտյան արժեքները» ոտնատակ արած Արևմուտքի ծնունդն է

Իլհամ Ալիևն ու ընտանիքը հերթական անգամ հայտնվել են նոր օֆշորային սկանդալի կենտրոնում: Արևմուտքի կողմից, կարելի է ասել, հերթական ճնշման լծակն է գործածվում Ալիևի նկատմամբ, ու վստահաբար, սա պատահական չէ:

Ալիևի ուղղությամբ ճնշումներ են բանեցնում, և օրերս, տեղեկատվական հերթական արտահոսքը միանգամայն տրամաբանական է: Այսպես, տեղի է ունեցել օֆշորային փաստաթղթերի հերթական խոշոր արտահոսքը, որում տեղեկություններ կան աշխարհի ներկա և նախկին տասնյակ նախագահների թանկարժեք ունեցվածքի մասին: Շուրջ 3 տեռաբայթ ծավալով փաստաթղթերը ստացել են «Պանդորայի թղթեր» (Pandora Papers) անվանումը: Փաստաթղթերում շրջանառվում են նաև Ռուսաստանի նախագահ Վլադիմիր Պուտինի և Ադրբեջանի նախագահ Իլհամ Ալիևի անունները: BBC-ն այդ առթիվ գրում է. «Ադրբեջանի նախագահ Իլհամ Ալիևը և նրա ընտանիքը, որոնք մեղադրվում են իրենց երկիրը թալանելու մեջ, օրինակներից մեկն են»:

Հետաքննությունը պարզել է. որ Ալիևներն ու նրանց մերձավորները վերջին շրջանում Մեծ Բրիտանիայում ավելի քան 400 միլիոն ֆունտի գաղտնի գործարքներ են իրականացրել: Մասնավորապես, Ալիևները, օրինակ, 31 միլիոն ֆունտի եկամուտ են ունեցել՝ Լոնդոնում իրենց անշարժ գույքը վաճառելով թագավորական ընտանիքին: Ալիևների ընտանիքը ընդհանուր 67 միլիոն ֆունտի գույք է վաճառել բրիտանական թագավորական ընտանիքին: Ալիևների ընտանիքի անունով 17 անշարժ գույք է գտնվել, այդ թվում՝ 33 միլիոն ֆունտ արժողությամբ գրասենյակային տարածքը Լոնդոնում՝ Իլհամ Ալիևի 11-ամյա որդու՝ Հեյդար Ալիևի համար: Այն ձեռք է բերվել 2009 թվականին:

Հետաքննող լրագրողների միջազգային կոնսորցիումը (ICIJ) ուսումնասիրելով համաշխարհային լիդերների և քաղաքական գործիչների եկամուտների վերաբերյալ միլիոնավոր գաղտնազերծված փաստաթղթեր՝ նոր զեկույց է հրապարակվել: Այսպես, Ալիևների ընտանիքը 30 միլիոն ֆունտ շահույթ է ստացել Crown Estate-ում իրենց գույքի վաճառքից:

Ըստ The Guardian-ի՝ հայտնի են ավելի քան 100 միլիարդատերերի, 35 համաշխարհային առաջնորդների և 400 պետական պաշտոնյաների օֆշորային գործարքները: Լրագրողներն անվանում են տեղի ունեցածը պատմության մեջ խոշորագույն օֆշորային տվյալների հոսք: Զեկույցում նշված են ավելի քան 600 լրագրողների ռեպորտաժներ 117 երկրներից:

Ըստ էության, Ադրբեջանի նախագահ Իլհամ Ալիևի ընտանիքը մեղադրվում է սեփական երկիրը թալանելու մեջ: Pandora Papers-ն մատնանշում է, որ Ալիևներն ու նրանց մերձավորները կապված են Մեծ Բրիտանիայում ավելի քան 400 միլիոն ֆունտի չափով անշարժ գույքի գործարքներում:

33 միլիոն ֆունտ արժողությամբ գրասենյակային շենքը՝ 11-ամյա որդի Հեյդարի համար, գտնվում է Լոնդոնի ամենաթանկարժեք շրջանում՝ Մեյֆերում, ձեռք է բերվել Mallnick Holdings, ընկերության կողմից, որը պատկանում է Իլհամ Ալիևի ընտանիքին 2009-ից: Մեկ ամիս անց սեփականության իրավունքը վերաձևակերպվել է Հեյդարի անունով: Արտահոսքի ենթարկված ֆինանսական փաստաթղթերի վերլուծության արդյունքում նաև պարզ է դարձել, որ մյուս գրասենյակային շենքը, որը գտնվում է մերձակայքում, Ալիևների ընտանիքը 2018-ին վաճառել է 66 միլիոն ֆունտով Crown Estate-ին, որից հայտնել են, որ նախքան գնումը անցկացվել են օրենքով նախատեսված բոլոր ստուգումները, իսկ այժմ իրականացվում է կրկնակի ստուգում:

Ըստ The Guardian-ի՝ «Հետաքննությունը ներառում է 11,9 միլիոն ընկերությունների ֆայլեր, որոնք հարուստ հաճախորդների կողմից վարձվել են «օֆշորային կառույցների հարկային ապաստարաններում», ինչպիսիք են Պանաման, Դուբայը, Մոնակոն, Շվեյցարիան և Կայմանյան կղզիները: «Այս բացահայտումները կարող են գլխացավանք դառնալ բրիտանական կառավարության համար, որովհետև Ալիևները, ըստ երևույթին, 31 միլիոն ֆունտ ստերլինգի շահույթ են ստացել՝ Լոնդոնի իրենց գույքերից մեկը վաճառելով Crown Estate ընկերությանը, որը պատկանում է թագավորական ընտանիքին և տնօրինվում է Մեծ Բրիտանիայի Գանձապետարանի կողմից», - ասված է հրապարակման մեջ։

Թե ինչպես կարձագանքի Ադրբեջանի թալանված ժողովուրդը ալիևյան ռեժիմի վերաբերյալ սենսացիոն հերթական բացահայտումներին, այն հասարակությանը, որն Ալիևը «կերակրում» է Լեռնային Ղարաբաղի «ազատագրման հաղթանակի» մասին ելույթներով, ադրբեջանական հասարակության գործն ու որոշելիքն է:

Սակայն առավել հետաքրքրականն այն փաստն է, որ ալիևյան ռեժիմի վերաբերյալ այսպիսի հերթական արտահոսքի հիմքում որևէ արևմտյան վեհ արժեքներ դավանող պետությունների, կազմակերպությունների կողմից գործողություններ չեն իրականացվում:

Ինչպե՞ս է մինչ օրս արձագանքել արևմուտքը Ալիևի կողմից թալանին, կաշառակերության բազմաթիվ փաստերին, փողերի լվացմանն ու կեղտոտ գործարքներին... Ոչնչով, խորհրդավոր լռությամբ:

Ավելին, Արևմուտքի կողմից աչք փակելը Ալիևին դարձրեց ավելի սանձարձակ, դրա վկայությունն է ուղիղ մեկ տարի առաջ թուրք-ադրբեջանական ահաբեկչական զույգի՝ Էրդողանի ու Ալիևի կողմից Արցախի նկատմամբ պատերազմական հանցագործությունները՝ ֆոսֆորային զենքերով և այլն:

Սա է այսօրվա արևմտյան արժեքների դավանող պետությունների պահվածքը: Հետևաբար, Ալիևը նաև «արևմտյան արժեքները» ոտնատակ արած Արևմուտքի ծնունդն է:

Մետաքսյա Շալունց