Անկոչ ՔՊ-ականները՝ Գորիսում

Հրապարակ օրաթրեը գրում է. Ազգային ժողովի Պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանի գլխավորությամբ մի խումբ ԱԺ պատգամավորներ` Արմեն Խաչատրյանը, Գագիկ Մելքոնյանը, Արփի Դավոյանը, Կարեն Համբարձումյանը եւ թիվ մեկ «ուսապարկ» Վահագն Ալեքսանյանը, նախօրեին այցելել են Սյունիքի մարզ։ Իշխանական պատգամավորների այցի հիմնական նպատակը Սյունիքում առկա խնդիրներին ծանոթանա՞լն է, թե՞ առաջիկա ՏԻՄ ընտրություններին իշխանական լծակների գործադրումն ու քարոզչություն անելը` սեփական թեկնածուների օգտին, դժվար է ասել։ Սակայն միանշանակ է, որ Սյունիքը շարունակում է մնալ այս իշխանությունների աքիլեսյան գարշապարը, իսկ իշխանականներն էլ, պատեհ-անպատեհ, փորձում են մաքրվել «սյունյաց ողջույններից» ու ցույց տալ, թե իբր Սյունիքում մարդիկ իրենց ընդունում են, սիրում եւ հաշտ են ներկա իրավիճակի հետ։ 

Տեղեկացանք, որ այս նպատակով իմքայլական պատգամավորներն անկոչ հյուրի կարգավիճակով Գորիսում մասնակցել են 44-օրյա պատերազմում անմահացած հերոս Էյներ Տատինցյանի հիշատակը հավերժացնող խաչքար-հուշարձանի բացմանը: Ավելին, չնայած նրանք առանձնապես ջերմ վերաբերմունքի չեն արժանացել, եթե չասենք, որ բացահայտ արհամարհված են եղել, մի քանի ռեպլիկ էլ են լսել իրենց հասցեին, մասնավորապես զոհվածի հայրը ներկաներին լսելի ձայնով ասել է․ «Երեխուս հողը դրեցին, եկել են հուշարձանի բացմանը, որ ի՞նչ անեն»: Սակայն դա չի խանգարել, որ իշխանական տուրիստները Ֆեյսբուքում հպարտ գրառում կատարեն այդ միջոցառմանն իրենց ներկայության մասին։

«Այսօր, Պաշտպանության եւ անվտանգության հարցերով մշտական հանձնաժողովի նախագահ Անդրանիկ Քոչարյանի գլխավորությամբ, ԱԺ պատգամավորներ Արմեն Խաչատրյանը, Գագիկ Մելքոնյանը, Արփի Դավոյանը, Կարեն Համբարձումյանը եւ ես ժամանեցինք Սյունիք»,- նախօրեին իր էջում գրել է ՔՊ-ական Վահագն Ալեքսանյանը՝ շարունակելով․ «Նախ Գորիսում մասնակցեցինք 44-օրյա պատերազմում անմահացած հերոս Էյներ Տատինցյանի հիշատակը հավերժացնող խաչքար-հուշարձանի բացմանը։ Այցելեցինք սահմանապահ զորքերի հենակետերից մեկը, տեղում ծանոթացանք զինծառայողների ծառայության պայմաններին, արձանագրեցինք առկա խնդիրները։ Տաթեւ-Աղվանի հատվածում ծանոթացանք Կապան տանող այլընտրանքային ճանապարհի կառուցապատման աշխատանքներին։ Պիտի ասեմ, որ ահռելի աշխատանք արդեն կատարվել է, եւ շատ շուտով ճանապարհն ամբողջությամբ պատրաստ կլինի։ Օրվա վերջում մոմ վառեցինք Տաթեւի վանքում, որտեղ եւ արվել է լուսանկարը»։ 

Գորիսից տեղեկացանք, որ հերոսը, որի հուշակոթողի բացմանը ՔՊ-ականներն այցելել են, Գորիսի փոխքաղաքապետ Մենուա Հովսեփյանի քրոջ որդին է, իսկ Հովսեփյանին, հայտնի է,  իշխանությունները կալանավորել են քաղաքական դրդապատճառներով։ Հերոսի ընտանիքին է պատկանում խաչքար-հուշարձան տեղադրելու նախաձեռնությունը, սեպտեմբերի 30-ին նրանք դա կյանքի են կոչել․ իրենց սեփական միջոցներով Գորիսի Սերո Խանզադյանի անվան թիվ 6 հիմնական դպրոցի բակում կանգնեցրել են հերոս Էյների հիշատակի կոթողը։ Սակայն բացման արարողությունից մեկ-երկու ժամ առաջ տեղեկացել են, որ այնտեղ են շտապում նաեւ ՔՊ-ական պատգամավորները:

«Իմ երեխու հուշարձանի բացումն էր։ Ես ոչ մեկին չեմ հրավիրել, ոչ էլ իրենց, ով ցանկացել` եկել է, ես իրենց (պատգամավորներին՝ Լ․ Շ․) չեմ հրավիրել»,- մեզ հետ զրույցում ասաց հայրը՝ Արութ Տատինցյանը։ Նա անընդհատ կրկնում էր․ «Ես ո՛չ այն կողմից եմ, ո՛չ` այս, ոչ մի կողմին չեմ խառնվում, որ աչքի գրող չդառնամ»,  շեշտելով, որ պատգամավորների հետ չի շփվել․ «Ես մի բան կարող եմ ասել՝ իմ երեխեն, որ չկա այս պահին, ես դրանում մեղադրում եմ ներկաներին՝ այսօրվա կառավարությանը, ես ուզեցի իրենց դա ասել, բայց չասացի, ուրիշ բան կդառնար, այդ օրվա համար ճիշտ չէր լինի»։  

Առավել մանարամասն՝ թերթի այսօրվա համարում