Նախարարը վնասների լուծման ճանապարհն է ցույց տալիս
Կենտրոնական բանկն ուսումնասիրում է կարկուտից տուժած գյուղացիների վարկային գործերը՝ մայր գումարի մարման հետաձգման ժամանակահատվածը որոշելու համար: Այդ մասին կառավարության նիստից հետո լրագրողների հետ զրույցում նշեց ՀՀ գյուղատնտեսության նախարար Իգնատի Առաքելյանը՝ ավելացնելով, որ հողի հարկի, ջրի վարձի հարցն էլ ուսումնասիրվում է Տարածքային կառավարման և զարգացման նախարարությունում և կառավարությունում: «Մինչև ապահովագրական համակարգը չլինի, չեն կարող փոխհատուցել։ Այդքան միջոց չկա, որ փոխհատուցվի բուն հասցված վնասը»,- ասաց նախարարը՝ նշելով, որ միայն ապահովագրական համակարգի ներդրումով կարող ենք խոսել փոխհատուցման և ավելի ապահովված գյուղացիական տնտեսության մասին։ «2018թ. սկսելու ենք պիլոտային ծրագիրը։ Երեք տարի է տրված։ Փորձելու ենք ավելի արագ անել»,- հավելեց Իգնատի Առաքելյանը։ Իգնատի Առաքելյանը նշեց, որ գյուղատնտեսությունում բնակլիմայական վնասները 5 տոկոսից ցածր են, ինչը բարենպաստ պայմաններ է ստեղծում ապահովագրական համակարգ ներդնելու համար: «Ապահովագրական ընկերությունների համար դա կլինի հետաքրքիր, քանի որ վնասի տոկոսն այնքան բարձր չէ: Լուծումը ապահովագրական համակարգն է, ուրիշ լուծում չկա»:
Հետևեք մեզ Viber-ում
