Թուրքիան տագնապ է առաջացնում. ՌԴ ԱԳՆ

Բաց երկնքի վերաբերյալ պայմանագրի շրջանակում Ռուսաստանի դիտորդական թռիչքի թույլտվության մերժումը Թուրքիայի կողմից փաստաթղթի կենսունակության վերաբերյալ տագնապ է առաջացնում: Այդ մասին ասված է ռուսաստանյան պատվիրակության հայտարարության մեջ, որը տարածվել է Վիեննայում Բաց երկնքի վերաբերյալ խորհրդակցական հանձնաժողովի արտահերթ նիստին: Տեքստը տեղադրված է ՌԴ ԱԳՆ-ի կայքում, տեղեկացնում է ՏԱՍՍ-ը: «Կարծում ենք, որ Թուրքիայի գործողությունները պիտի Բաց երկնքի ընկերակցության ոչ թե մտահոգությունը, այլ տագնապն առաջացնեն փաստաթղթի` որպես վստահության եւ անվտանգության ամրապնդման արդյունավետ միջոցի կենսունակության վերաբերյալ», - նշված է հայտարարության մեջ: Ռուսական կողմը «իրեն իրավունք է վերապահում համապատասխան եղանակով արձագանքել Թուրքիայի կողմից Բաց երկնքի վերաբերյալ պայմանագրի խախտմանը»: Մոսկվան «պայմանագրի մասնակից այլ պետություններից եւս արձագանք, այդ թվում` Անկարայի գործողությունների օբյեկտիվ գնահատական է ակնկալում»: «Դրա բացակայությունը միայն մի բան կնշանակեր`  պայմանագրի կատարման հարցերին մոտեցումների վերաբերյալ «երկակի ստանդարտներ»», - ընդգծել են ռուսաստանյան պատվիրակությունից: