ԼՂ շփման գծում խախտումներն արձանագրող տեխնիկական միջոցների տեղաբաշխումը մնում է արդիական. Մ. Մելքումյանի ելույթը ԵԽԽՎ-ում
Եվրոպայի խորհրդի խորհրդարանական վեհաժողովի ամառային նստաշրջանի լիագումար նիստում այսօր ելույթ է ունեցել հայկական պատվիրակության ներկայացուցիչ, ՀՀ ԱԺ նախագահի տեղակալ Միքայել Մելքումյանը: Իր ելույթում Մելքումյանն ասել է. «Հայաստանի համար փախստականների խնդիրը նույնպես շատ կարևոր է և արդիական՝ Սիրիայից ներգաղթող փախստականների առումով: Այսօր կարելի է ասել, որ Հայաստանն ընդունել է ավելի քան 22000 փախստականների: Սակայն մենք պետք է այսօր ոչ միայն քննարկենք, այլև գտնենք համարժեք լուծումներ, այդ թվում՝ Եվրոպայում և այլ երկրներում համանման իրավիճակների լուծման նպատակով: Այդ գործընթացին գնահատականներ տալու համար նույնիսկ մենք չունենք համապատասխան գործիքներ, որովհետև տարբեր երկրներում, կախված փախստականների թվականից, նրանց՝ տեղում հարմարվելու պայմաններից, սոցիալական, կրթական, առողջապահական և այլ կենսաապահովման խնդիրների լուծման ծախսերի միջև կան հսկայական տարբերություններ: Ուստի մենք պետք է ունենանք գնահատման համարժեք մեխանիզմներ: Հայաստանին հաջողվել է լուծել Սիրիայից ներգաղթած փախստականների կրթական, աշխատանքին հարմարվելու, ավելին՝ աշխատանքի տեղավորման շատ հարցեր՝ առանց արտաքին ֆինանսավորման աղբյուրների: Սակայն բոլոր տարածաշրջաններում էլ, այդ թվում և Հայաստանում անհնար կլինի լուծել վերը նշված բոլոր հարցերը առանց կայուն տարածաշրջանի առկայության: Ուստի ես գտնում եմ, որ այդ թվում ԼՂՀ և ադրբեջանական սահմանին տիրող վերջին իրադարձությունները այլընտրանք չունեն, քան ԵԱՀԿ մինսկի խմբի շրջանակներում խնդրի խաղաղ կարգավորումը: Այդ նպատակով առավել քան արդիական է մնում կոնֆլիկտի շփման գծի ողջ երկայնքով հրադադարի ռեժիմի խախտումներն արձանագրող տեխնիկական միջոցների անհապաղ տեղաբաշխումը»:
Հետևեք մեզ Viber-ում
