Փաշինյանը խոսեց դավադիր պայմանավորվածության մասին

Կառավարություն-Ազգային ժողով հարցուպատասխանի ժամանակ Նիկոլ Փաշինյանը, պատասխանելով պատգամավորների հարցերին որքան էլ փորձեց ստել, մանիպուլացիաներ ու կրուտիտներ անել, մեղքը սովորության պես գցել նախկինների գրպանը, իսկ երբեմն էլ ուղղակի չպատասխանել հարցերին, այդուհանդերձ մի շարք վտանգավոր խոստովանություններ արեց: Օրինակ, խոսելով Գորիս-Կապան ճանապարհահատվածին տեղակայված մաքսակետի մասին, նա պնդեց ավելի վաղ հնչեցրած տեսակետը, որը ադրբեջանական անունով՝ Էյվազլի էր կոչել: Ասաց, որ այդ հատվածը չի ացնում Հայաստանի տարածքով, ասել է, թե այդ տարածքը Ադրբեջան է:
«Ասում եք, թե Ադրբեջանը կանգնեցնում է իրանական մեքենաներն ի պատասխան նրա, որ մենք միջանցք չենք տալիս։ Փաստորեն, սրանք Ադրբեջանի հերթական ապօրինի գործողություններն են, սադրանք են՝ մեզ ճնշելու, որպեսզի տրամադրենք միջանցքը։ Պարզ է, որ հայկական շահը թելադրում է, որ մենք միջանցք չենք տալու։ Այսինքն, Ադրբեջանն ամեն անգամ նման սադրանքի է գնալու, իսկ մենք համարժեք գործողություններ չենք իրականացնում։ Լավ, այսքան պարտվողական քաղաքականությամբ մենք ինչքա՞ն զիջումների ենք պատրաստ գնալու։ Երաշխիք կա՞, որ հայկական մեքենաները չեն կանգնեցնելու, որ Սյունիքի գյուղերը նորից շրջափակման մեջ չեն հայտնվելու»,- դիմելով Նիկոլ Փաշինյանին՝ ասաց «Հայաստան» դաշինքի պատգամավոր Աննա Գրիգորյանը։ Նիկոլ Փաշինյանը հերթական վտանգավոր խոստովանությունն արեց. «Մեր գյուղերը շրջափակման մեջ չեն հայտնվել եւ չեն հայտնվելու։ Կա՞ն արդյոք ռիսկեր, այո, կան ռիսկեր, եւ կառավարությունն այդ ռիսկերը կառավարելու համար ձեռնարկում է բոլոր անհրաժեշտ միջոցառումները»։

Նույն դաշինքից Հռիփսիմե Ստամբուլյանը նկատեց, որ վտանգավոր հայտարարություն է արվում, հետաքրքրվեց՝ մինչև ե՞րբ է այս վիճակը շարունակվելու: Սակայն Փաշինյանի փոխարեն պատասխանեց Սուրեն Պապիկյանը՝ ասելով, որ այլընտրանքային ճանապարհ կա: Սա նշանակում է, որ մենք այլեւս կորցրել ենք մեր վերահսկողությունն այդ հատվածի նկատմամբ եւ դա ադրբեջանական ճանապարհ է:
Մեկ այլ դրվագով Փաշինյանը խոստովանեց, որ Ադրբեջանի հետ բանավոր պայմանավորվել է, այսպես կոչված սովետական Ադրբեջանի մտացածին սահմանները վերականգնելու հարցում։ Ինչո՞ւ բանավոր, որովհետև այդ մասին երբևէ խոսք չի եղել արցախյան կարգավորման բանակցային գործընթացում, բառ անգամ չկա 2020թ. նոյեմբերի 10-ի եռակողմ կապիտուլյացիոն հայտարարության մեջ։ Այդ մասին ակնարկ չկա նաև 2021թ. հունվարի 11-ի եռակողմ հայտարարության մեջ։
«Գիտեք, որ 2020թ․ դեկտեմբերին մենք իրականացրինք ՀՀ ԶՈՒ դիրքերը ՀՀ-ի՝ խորհրդային միությունից ժառանգած սահմանների հետ համապատասխանեցնելու գործընթաց, եւ այն իրականացվել է՝ ռազմական նոր էսկալացիայից խուսափելու համար։ Խնդիրն այն է, որ այս համատեքստում 2010թ․ ՀՀ ԱԺ ընդունած վարչատարածքային բաժանման մասին օրենքում արձանագրված է, որ Շուռնուխի եւ Որոտանի վարչական սահմանները համապատասխանում են հայ-ադրբեջանական սահմանին։ ԽՍՀՄ ժամանակ այդ հատվածում խորհրդային ՀՀ-ի եւ խորհրդային Ադրբեջանի գոյություն ունեցած վարչական սահմանն է, որը հետո վերածվել է պետական սահմանի եւ այս իրողությունն է ընդունվել որպես հիմք»,-այդ հակապետական քայլի մեղքը փորձեց գցել նախկինների գրպանը՝ ասելով, թե վարչատարածքային բաժանման մասին հայտնի օրենքով է այդպես:
Հիշեցնենք, որ 2020թ. նոյեմբերի 10-ի հայտարարության մեջ (բացառությամբ Աղդամի, Քարվաճառի և Քաշաթաղի շրջանների) հստակ գրված է, որ կողմերի զորքերը կանգ են առնում այնտեղ որտեղ գտնվում են լիակատար հրադադարի պահին։ Դա ենթադրում է, որ (ըստ 2021թ. հունվարի 11-ի հայտարարության) հետագա սահմանազտման աշխատանքների արդյունքում և միայն միջպետական համաձայնագրով կարող են պետական հանձնաժողովները համաձայնվել վերջնական սահմանանշման շուրջ։ Այնինչ, մինչև սահմանազատումը, Նիկոլ Փաշինյանն արագ դուրս բերեց զորքերը նաև Կովսականի և Սանասարի շրջաններից, բացելով թշնամու ճանապարհը դեպի Հայաստան:

Ինչ վերաբերում է 2010թ. «Վարչատարածքային բաժանման մասին» ՀՀ օրենքին , ապա այն ընդունվել է դեռեւս 1995թ-ին , իսկ 2010թ.-ին փոփոխությունների է ենթարկվել, եւ դրանով Ադրբեջանի հետ պետական սահման չի որոշվել կամ տեղորոշել, որովհետև այդ օրենքը ոչ մի կապ չունի պետական սահմանների որոշման հետ։ Ինչպես հուշում է դրա անունը, այն Հայաստանի վարչատարածքային բաժանման մասին է, այսինքն՝ դրանով ամրագրվում և նկարագրվում է ոչ թե երկրի արտաքին-պետական, այլ ներքին սահմանները՝ համայնքների : Իսկ Ադրբեջանի հետ Հայաստանը մինչ օրս սահմանի վերաբերյալ պայմանագիր չի կնքել:

Անի Սահակյան